劉德華學白蘭度演《旺角卡門》

馬龍白蘭度日前逝世，其《教父》中演繹的黑幫人物，對一眾香港男演員影響甚深，劉德華更直言曾模仿他演出。
劉德華：佢所有電影我都有收藏，《教父》對我嘅影響都幾大，我拍《旺角卡門》有幾場戲係學佢㗎，不過冇人知，好似一場我行去雪櫃度飲水嘅動作，就係學佢套《慾望號街車》囉，佢去世係演藝界一個極大嘅損失。
呂良偉：馬龍白蘭度係一個好有成就、好偉大嘅演員，佢嘅離開係荷李活好大嘅損失，佢有好多好經典嘅作品，我印象最深刻嘅係《教父》，佢嘅表現可以用震撼嚟形容，我覺得好多演員不知不覺咁參考緊佢嘅演出，不過我做丁力就冇攞佢嘅神髓，覺得唔係咁啱。
吳鎮宇：如果佢好似占士甸（JamesDean）咁早死，就會係另一個神話，佢當年拍《慾望號街車》，帶起咗將底衫着出街嘅熱潮，我最欣賞佢呢套戲同埋《教父》，好似占士甸咁，係外形蓋過演技，但佢演技嘅光芒蓋過外形，好難得。
任達華：《教父》呢套戲，真係百看不厭，我好欣賞佢做藝人嗰份精神，每次onstage都做到盡善盡美。