盧巧音（Candy）前晚去會展出席香港專業教育學院畢業時裝展活動，原來佢十年前都係喺呢間學校畢業，而嘉碧儀重着住畢業生嘅作品行天橋。
Candy同馮仁昭講佢拍緊套《六壯士》，本來有一場同李克勤嘅激情床戲，佢話之前準備咗成個月，係咁諗應該點拍，點知場戲取消咗，令佢好失望。
Candy話：「我第一次嚟㗎，都唔知幾時先有得拍。」Candy重話因為對手係克勤，所以好放心，因為佢一定唔會乘機鹹豬手。問Candy最想同邊個男藝人拍床戲，佢話：「石修啦，佢好gentleman，我喺無綫撞過佢兩次，有啲人會特登嚟摸吓你，但佢唔會，同佢拍，我做二奶都唔介意。」如果冇石修，問佢石仔陳宇琛制唔制？Candy話：「唔好，太細呀。吳彥祖都幾好，其實我同邊個拍都冇所謂，最緊要有火花。」咁余文樂唔知會唔會重有火花呢！
此外，Candy噚日出席喺西鐵兆康站舉行嘅活動，講到最近有指佢個契細佬周永恆（阿Roy）嘅女朋友趙頌茹，好似已經搬離咗佢哋嘅愛巢，Candy聽完之後就話：「係咩，我唔知喎，都冇聽阿Roy提起，不過我唔想再講啲乜嘢，感情事都係佢哋自己搞掂啦。」
施念慈同老公陳鴻業（Alan）傳出分居，噚日Alan下晝四點幾離開佢喺九肚山嘅寓所，對於記者嘅提問全部以「冇呀，唔知呀」回答，木無表情，之後佢就去咗西環，馮仁昭八到佢係去咗個男性朋友屋企度打壁球，呢排佢全力𠱁緊老婆搬返屋企，但女方重未應承返去。馮仁昭知佢兩個都重係鍾意對方，但夫妻相處真係好大學問，唔係咁簡單。
吳浩康（阿Deep）噚日繼續為無綫電視劇《學警雄心》入電視城開工，阿Deep六點半由助手陪同下準時入廠，佢嘅精神比之前好，入廠見到大批記者都面帶笑容，重任影唔嬲，阿Deep話：「今日都係拍番幾場打泰拳嘅戲。」講完呢句之後佢就衝入廠，想問多兩句都冇機會。
黎明噚日喺台灣宣傳，提起台灣奇女子許純美早前話要拍自傳，重想搵最鍾意嘅黎明做男主角，黎明同台灣傳媒講話覺得許純美好正常，自己亦唔排除會同佢拍戲，又話佢嘅fans孔慶翔其實幾聰明，只係以智慧去搞笑，黎明認為呢兩個人嘅言行只係成名嘅方式，外界唔需要用咁高嘅標準去衡量佢哋，黎明咁講，會唔會係明讚暗踩呢？
薛家燕日前因為中暑不適，本來噚日佢要出席一個頒獎禮，但佢依然好唔舒服，起身嗰陣重覺得頭暈暈，所以就即刻打電話畀主辦單位話去唔到。一向敬業樂業嘅好姨對於自己今次缺席活動覺得唔好意思，好彩佢今日唔使開工，可以繼續喺屋企休息一吓。
