《江湖》票房好，但與口碑似乎有啲唔相稱，可能之前宣傳工夫做得太好，劇中出現演員卡士強勁，令到觀眾有極高期望，有唔少人甚至當作一部新版《無間道》來睇，珠玉在前，咁樣比較並唔公平。事實上《江湖》一片整體水準不俗，筆者尤其喜歡片中拍攝手法，今個星期剛推出3區DVD，戲迷絕對唔可以錯過。
記者：許福合
黑幫內鬥
個人覺得，用《江湖》作戲名並唔貼切，睇完後覺得用兄弟之類作片名可能更好，事關片中重點唔係黑幫爭地盤，重點係兩主角由少年時開始嘅兄弟情。故事一開始就講大佬洪仁就（劉德華飾）想退位，引起一班左右手爭位，而洪仁就就想與左手（張學友飾）一齊洗底。這時一個消息傳盛江湖，有人要喺12小時內將洪殺掉，而出賣者正係洪身邊嘅人。左手一向心狠，更預備殺手準備將有嫌疑嘅人一一清除。不過左手做法並未得到洪認同，力勸左手收手。
以上其實只係「主線」，劇中更不斷加插洪同左手少年時嘅事作為副線，分別由余文樂同陳冠希飾演，講到他們如何為求爭上位，不惜接受死士任務。可惜劇中似乎未能清楚分明主線同副線，難以令觀者代入劇中角色。雖然有啲瑕疵，不過效果亦算唔錯，令人有相當大嘅想像空間。雖然類似故事亦曾經出現，《江湖》故事唔算新鮮，不過特別之處，係透過打亂時空，令觀者產生錯覺，以為余文樂同陳冠希追殺嘅目標係洪，直至劇終才交代余文樂同陳冠希係少年時代嘅洪同左手，呢方面相當成功，連筆者亦估唔到！
就演員來講，劉德華同張學友演技當然毋庸置疑，不過筆者覺得劇中反以新人更搶眼，余文樂與陳冠希都有不俗演出，另外就要一提林苑，戲份唔算多，但令人耳目一新，話唔定有力問鼎新人獎項！張學友飾演左手，一味夠狂，但又發揮得淋漓盡致，劉德華仍係一個劉德華Look，冇咩新鮮感，不過造型就要一彈，唔似一個黑幫大佬，太冷酷又唔似一個商人。其他演員更包括曾志偉、吳倩蓮、苗僑偉、徐少強、林家棟，統統係好戲之人，卡士夠晒強勁！
BonusDisc內容好豐富，包括製作特輯、演員專訪、音樂特輯、從未播映之片段、相集、N.G.片段等。
