「轟隆」，九丈遠都聽到咁響又有晒Beat嘅電單車怒哮聲，未見車都知呢兩部必定係「猛料」，到真正見到真身時，確被眼前兩部啞黑色電單車吸引，加埋誇張嘅改裝電鍍車頭，「聲」同「樣」一樣霸氣，所到之處無人不望。想知點樣可以將一架普通日本電單車改頭換面，將之變成日本暴走族Chopper，等兩位幕後高手兼車主Wick同Zevil現身說法！
記者：黃婉冰 攝影：林栢鈞
Chopper主要有美式同日式改裝法，Wick同Zevil二人偏偏鍾意將自己架鐵騎改成百分百日式暴走族，全因愛佢夠Young。「日式暴走族後生啲，美式改法畀人感覺較成熟。喺香港玩暴走嘅人較少，我哋嘅改車心得都係睇日本電單車雜誌得來，但改還改，我哋車會始終提倡安全駕駛為主，所以就算咁改法都好少畀人抄牌，有次重試過俾警察話我架車好型。」
改車就好似扮靚一樣，唔係將所有名牌貨搬晒上身就掂，正如二人話齋，最緊要係清楚知道自己鍾意啲咩。「一架改得靚嘅電單車，外形睇落會係成個三角形咁，即係中間會高出嚟，呢啲先叫『最完美體態』，唔係求其將所有改裝零件搬晒上車就得。改之前最緊要搞清楚自己鍾意咩類型，即係要先有Concept；改車係無限，同一架車可以改幾個唔同Style。」
就咁聽會以為改車好易，訂完配件裝上去搞掂，但對於唔鍾意原廠配件嘅Wick同Zevil嚟講，用日本配件改裝，背後其實都幾辛酸。「我哋唔鍾意原廠配件，唔夠特別，但有時喺日本訂貨又未必啱裝，咁咪改到啱裝為止，有時改唔到會好失望，所以訂貨時真係要博一鋪。𠵱家最大問題係香港車房根本唔識改，所以訂完貨後，要諗好晒點改再教埋佢哋先至得，總之玩改裝背後都有好多辛酸史。」
車主：Wick
引擎容積：400cc
出廠年份：1997年
擁有年期：3年
全車改裝費約$16,000
約$10,000
將原裝低軚改高，頭Fork加長6吋，可以調校不同斜度，換咗眼鏡盤，車頭大執過後，比原裝霸氣得多。
車主：Zevil
引擎容積：400cc
出廠年份：1997年
擁有年期：2年
全車改裝費約$21,700
十個女朋友，九個都唔鍾意男朋友玩電單車，怕有危險係最大原因，但Wick嘅女朋友唔單止贊成，而且還受其感染。「我知佢由細到大都好鍾意電單車，因為佢玩得安全，所以我唔會反對，反而開始變得有興趣，有時我更會陪佢去改裝，畀啲意見，我𠵱家呢個Style唔多唔少都係受佢影響！」
