自由行大翻兜，零售類率先牽頭，暑假將至，估計下一波會輪到酒店股，泛海集團（129）要昅實。
今年香港暑假，肯定熱鬧，皆因開放來港自由行城市共達到32個，酒店業理應旺上加旺。講明炒酒店股，主攻泛海而非泛海酒店（292），原因好簡單，泛海乃泛店控權股東，泛店得益，泛海一樣得益。再者，泛海資產折讓達67%，泛店則不過27%左右。
另年，部份地產股受惠回撥或物業重估增值，業績躍進，富豪（078）如是，香港興業（480）如是，估計泛海亦如是。泛海02年度及03年度，就物業撥備減值近4億元，往年撥備太大，年來售樓理想，可炒回撥。最近一個月，泛海兜小圓底，上周五又突破3月以來下降軌，雙重利好技術形態，破位即上。
遠展（035）5月30日（周日）見報推介，翌日股價最低1.27元，最新報1.43元。再推遠展，除一樣食正自由行酒店概念，近期所見，名牌如嘉誠及大摩，已為個別上海房地產股寫睇好報告。遠展份屬優質上海地產發展商，未來幾年，因售樓大豐收，PE得兩三倍，所以，晨早已經有基金昅實。現階段市場恢復信心，遠展好易三爬兩撥，破關就上。
遠展上年7月25日公布03年度（3月止）業績，04年度業績期又快公布。呢個星期，望實大利是機，皆因業績公布日一登上大利是機畫面，資金會偷步炒業績，股價有反應；又若果提前公諸同好，人同此心，認定好事，追捧效應會更猛烈。
錢雋