楊采妮與男友邱韶智相戀多年，更一度傳出婚訊，豈料楊采妮棄影從商五年多後，不但賠了生意，也輸了感情。楊采妮日前接受本報記者專訪時，終於首度承認與邱韶智分手，但她仍然無怨無悔，更認為能從失敗中吸取寶貴經驗。
楊采妮（Charlie）十七歲加入娛樂圈，在幸運之神眷顧下，迅速成為玉女接班人，歌影兩方面都甚為得意，不過她在圈中發展僅五年多，卻毅然決定急流勇退，轉而從商，與男友邱韶智一起經營形象顧問公司。雖然公司的大股東是邱韶智，但Charlie仍全情投入，可惜兩年前不幸遇上九一一事件，令其公司生意額大跌，終於賠本收場，而Charlie今次不但輸了公司，連與男友的十年感情亦一併賠上。
雖然有關Charlie與邱韶智分手的傳言時有所聞，但Charlie一直不肯回應，直至日前接受本報記者專訪時，才終於親口承認已與邱韶智分手。Charlie表示與邱韶智由十多歲起已開始拍拖，在營商初期有錢賺的那一段日子，二人亦曾有結婚的打算，雙方家長亦盼望可以早日喝喜酒，萬料不到這一段情會發展成分手地步。
對於外間一直盛傳她與男友是因財失義而分手，Charlie忍不住要為邱韶智平反，她說：「係，我同佢係分咗手，但我想話畀大家知，分手同錢銀根本冇關係，喺公司最後一年，我哋遇到好多困難，但我哋都係一齊去共同解決問題。所以就算分咗手，𠵱家同佢依然係好好嘅朋友，經常有通電話。我同佢十幾歲就認識，拍拖超過十年，情侶一齊做生意，日日見住，但成日就係開會，感覺唔似拍拖。呢段感情結束咗後，到𠵱家我都未有新追求者，所以我同佢將來會唔會再走番埋一齊，真係唔知道。」
Charlie又坦言在營商最困難的日子裏，兩口子也曾有意見分歧的時候，但她說：「佢係最大股東，呢段時間其實佢都幾辛苦，因為公司好多問題佢同我都要想辦法解決，但我同佢好少會為財政問題有乜嘢爭拗，但呢個時候，外間實在有太多不盡不實報道，搞到公司同事都唔敢返工，而我同佢為解決公司問題已經夠忙，邊度重有心情同時間向外間解釋咁多。加上公司嗰陣不斷變化，根本就交代唔清啦！既然𠵱家乜嘢都成為過去，我唔可以令人再對佢有誤解。不過我實際蝕嘅錢亦少於五百萬，間公司結束咗，我並冇負上任何債務。講真𠵱家我都係三十歲，重輸得起。」
不過，Charlie表示雖然耗掉不少積蓄，但她從未為當年棄影從商的決定後悔。Charlie說：「當年我離開娛樂圈時只不過係二十幾歲，我覺得應該趁自己後生去試吓其他行業，而我對做生意真係好有興趣，所以好想試吓。雖然今次做生意表面上係失敗咗，但實際上我亦得到好豐富嘅做生意經驗。」
結束公司重投娛樂圈發展的Charlie，現時亦抽空修讀法律課程，因為她在五年多做生意的過程中，發現不懂法律是十分吃虧的事。Charlie說：「以前做生意我成日要自己落手落腳去寫計劃書同人傾合作，所以我發現會計同法律都好緊要，所以我𠵱家就修讀一個英國嘅法律課程，考試我就選擇喺新加坡考。」
問到Charlie會否再做生意時，她思索了一會兒才說：「我真係冇再諗，其實間公司結束我都幾心痛，因為我的確花咗唔少心血落去，頭嗰幾年其實都有錢賺，同班員工好似一家人咁，大家好有士氣去做呢間公司，點知遇着美國發生九一一事件，好多外國合作計劃全部取消，咁樣公司先至捱唔住。爹哋同媽咪成日同我講，錢能夠解決嘅問題就唔係問題，所以喺公司最困難嘅時期我一樣撐得落去。」
採訪：陳月媚
攝影：仇志德
場地提供：BB'sBistro
化妝：AndyLeung
髮型：PlusYiu
服裝提供：Anteprima、SalvatoreFerragamo