民間人權陣線今年7.1再接再厲，號召五十三萬市民人街，再次兜口兜面打咗班土共一巴。但係八方知道，民陣搞今年7.1遊行重辛苦過上年，因為上年唔知道有五十萬人咁多人，預備工夫就自然冇咁足，今年一早預咗最少有成三幾十萬人，乜都要做好準備，淨係搵義工都搞到民陣發言人孔令瑜頭大，但佢千計萬計，都計漏一樣嘢，就係冇預到要兼職做埋解款員。
話說嗰日遊行完，急急收好啲捐款，但係民陣冇準備到保險箱之類存放金錢嘅物體，因為根本無法即日存入銀行，諗咗好耐，終於諗到放喺一處最安全地方，就係收喺曾蔭權辦公室樓下，立法會議員喺政府總部嘅辦事處，淨係政府總部班保安，真係唔打得都睇得，於是求其搵幾個紙皮箱，將銀紙塞哂入去，就同兩個同事坐的士去政府總部，原本佢哋想將幾箱銀紙放喺的士司機旁邊個位，但係司機大佬唔肯，於是焗住將幾十萬蚊放係車尾箱，八方諗嗰位司機大佬都唔知自己架車做咗解款車。
到第二日孔令瑜重要兼職解款員，用手推車推住幾箱銀紙去銀行入錢，當然就梗冇揸住槍嘅解款員保護，難怪事後有人講笑，呢次都係史上最兒戲嘅解款行動！
（圖）民陣喺7.1遊行樣樣準備都唔錯，就係漏咗保險箱。
傳真︰2623-9278
電郵︰