民政事務局局長何志平（圖）噚日喺獅子會安排下，同一班年輕人對話，點知對話差啲變咗對罵。實情係咁嘅，有位細路哥當面向何志平投訴，話政府冇提供設施畀佢哋塗鴉踩滑板。
何局長就表現得好了解時下青年，佢答話，年輕人鍾意同政府搞對抗，唔鍾意去政府開嘅地方，政府畀個地方佢哋塗鴉，年輕人就偏偏唔會去。
何志平講到班少年咁反叛，有位細路就提出反駁話，板仔唔一定係反叛分子，唔係一定要打高爾夫先係健康運動，政府唔應該定性咗塗鴉同踩滑板就係反叛行為。何局長真係襟撈，一見勢色唔對，即刻轉軚，改口話其實塗鴉踩滑板都值得推廣，又話班少年好可愛，都唔知佢邊句先係真心話。
傳真︰2623-9278
電郵︰