賓架F到鏞記食燒鵝，次日去上海總會食生煎包、上海粗炒麵，大讚好味。上海粗炒麵係平價貨色，去三六九、四七八都有得食，周街都係，但炒到好似上海總會咁嘅賣相好，唔油淋淋，麵條唔軟，豉油靚，夠上色，賓架F最鍾意食，雖然膽固醇超標，每次到上海總會，總要叫番一碟，其實只敢食半碟。
食鵝、食上海粗炒，要運動吓至得噃，賓架F話：「你同我定，我朝朝去山光道馬會游水keepfit，食完第二朝咪最多游多兩個池！」雖然日日游水，點解重有啲肚腩呀？鄭海泉、鄺其志、李明逵都係朝朝到馬會游水，三個人都冇中年發福喎？
賓架F話：「可能因為我鍾意食，游完之後，特別肚餓，於是去『六化郎』（馬會咖啡室）食早餐，好開胃。」運動之後，又擦一餐，消耗咗嘅卡路里又補充番，譬如行完一千步，食番個菠蘿包，等於冇行過。賓架F邊食早餐，邊睇報紙，突然有牢騷：「呢個世界都係你有你講，我有我做，投訴照聽，態度依舊。馬會餐廳有好多報紙，偏偏冇《文匯報》，我屋企、公司都有訂報紙，冇訂《文匯報》，想話喺會所睇，點知馬會又冇。馬會咁多錢，兼且訂《文匯報》係政治正確噃，點解馬會唔訂一份？你知喇，《文匯報》好多CEPA稿、大陸稿，係其他報紙冇嘅，啱我哋睇㗎！我向馬會投訴過，冇人理睬！」
自己唔訂，要會所訂，可見好多人對《文匯報》嘅態度就係戒買唔戒睇，有就一定睇，即係《文匯報》嘅讀者人數可能多過銷量好多。呢類報紙最啱會所訂購，反為一啲暢銷報紙人人屋企有，會所冇都冇所謂。