許冠傑（Sam）在紅館舉行的復出演唱會，晚晚唱至凌晨，康文署昨日發信警告阿Sam不要再超時，否則後果自負，令阿Sam與製作單位極度不滿，除即時召開記者會炮轟政府外，阿Sam更感對政府心灰意冷，有意取消十月個唱。
籌辦許冠傑演唱會的製作單位恆藝亞洲負責人丘亞葵昨日傍晚突然在紅館召開記者會，指昨日下午收到康樂及文化事務署來信，要求阿Sam演唱會在晚上十一時半前完騷，否則後果自負，令阿Sam和主辦單位極度不滿。
丘亞葵說：「其實我哋唔係第一次收到信，但今次多咗後果自負四個字，而且係康文署、警方、運輸署同九廣鐵路聯名寫信嚟，我想問吓康文署，乜嘢叫做後果自負？係咪啲市民趕唔到車返屋企俾人打劫要我哋負責？抑或個騷提早收工，觀眾唔開心，康文署後果自負？呢個部門真係不可理喻，由開騷到𠵱家已經不停阻攔我哋。」
丘亞葵愈說愈激動：「政府補貼一億二千萬畀維港騷，最後蝕晒大本，香港市民有冇得着？帶畀市民幾多娛樂？阿Sam今次個騷，令到好多香港市民開心唔在講，更加帶挈政府賺咗三千萬，賺多我哋成十倍，竟然得到咁嘅回報？我哋同阿Sam真係覺得好失望，既然政府咁做，我哋咪惟有撤出香港市場，去第度做囉！」
問到阿Sam個唱會否提前完場時，丘亞葵說：「今晚唔cut㗎啦，觀眾咁開心，點cut啫？我哋每晚罰錢都有畀錢出嚟㗎！但如果大家企到咁硬，咁咪早收囉！」未知阿Sam有何反應？丘亞葵說：「阿Sam梗係唔開心啦，佢對香港市場好失望，心灰意冷，十月份演唱會都想唔做。好似我哋擺個大公仔喺紅館都唔得，要我哋每晚畀一萬一千六百蚊，頭一晚我哋已經畀咗，𠵱家同佢哋傾過之後，每晚擺兩個鐘先至唔使畀錢。」
康文署新聞組JuneTong昨日在電話中說：「我哋承認今日係向許冠傑演唱會主辦單位發出函件，因為個騷太遲散場，警方同運輸署要加派額外人手配合人潮，亦顧慮觀眾完騷後冇交通工具返屋企，發信唔係罰，係提醒，希望大家商量解決方法，例如可唔可以提早開騷。」而阿Sam昨晚一開騷即寸政府說：「我今晚唱七個鐘，其實個騷冇話做幾耐，唱三個字拉隊走都得，但我咁做你哋唔會買飛嚟睇，我唱咁耐都係感激你哋之嘛。」
此外，阿Sam下月開拍的新片將由《我要高飛》改名為《誰在我心裏》，並邀請所有曾參與他個唱的嘉賓參與新片演出，包括梁詠琪、古巨基、鄭中基等，以作為個唱的延續。
採訪：戴彩煥、胡比
攝影：仇志德
