日期7.1、地點維園，有一個主教同四個教徒站在台上伸出象徵和平同希望嘅橄欖枝向中國示好；八方講嘅主教當然係陳日君，而四個教徒就包括兩個天主教徒李柱銘同黎智英，以及兩個基督徒司徒華同李鵬飛。
呢個非常組合的確神奇，媽田話正好配合祈禱會由天主教同基督教兩個教會聯合主辦嘅精神，華叔好少表露佢教徒嘅身份，但係亦認為諾厄方舟嘅故事講到白鴿啣來橄欖枝表示洪水退去、陸地在望，同民主黨好有關係，因為民主黨嘅黨徽就係一隻白鴿。
講番個遊行，李柱銘今年冇推到捐款車，反而沿途猛俾人打心口，今次7.1真係出錢出力完全奉獻，結果行到間涼茶舖想飲杯冰凍蔗汁，先發現個袋冇晒錢，好彩後來有個記者行家仗義出錢請媽田飲杯。
八方知道，媽田一直好擔心佢貿然向中國伸出和平之手，講溝通會引起誤會，不過，前日7.1咁多市民要爭相同佢攞簽名拍照就唔使再驚，有個市民重回味無窮咁話畀四周圍嘅人知佢同媽田握咗手，可惜冇帶相機。
其實，最早忽然提出要和解嘅劉千石都係基督徒，但係祈禱會就冇佢份，喺遊行期間阿石亦非常低調，八方聽聞，職工盟早前開會，為石哥度身設計一條較輕鬆嘅遊行路線，以減輕身患腰疾嘅石哥遊行之苦，又可避開「長毛」梁國雄，費事畀長毛柴阿石台，不過石哥久經風浪，當日只係調整吓到場時間同遊行步伐，就輕易避免出現尷尬場面。
（圖）媽田（右二）同去年一樣咁受歡迎，前日遊行期間不斷有人搵佢握手合照。
傳真︰2623-9278
電郵︰