今屆歐洲國家盃爆冷爆到七彩，好多國家隊教練都執包袱辭職收場；論𠵱家最紅最勁教練，都係以雲格手執牛耳，佢將一隊低潮嘅阿仙奴，教到奪得今年英超聯冠軍；如果你都好想學雲格一樣，過下調兵遣將嘅領隊癮，今個星期最新返嘅《創造職業球會'04》必玩，不過你所教嘅係更富挑戰性嘅J.League，想知至勝之道，就睇筆者今日新手教路！
記者：許福合
人數：1人
開發：SEGA
類型：SLG
機種：PS2
售價：約$400
版權：SEGA
以往《創造職業球會》都係必炒之作，加上今次撞正歐洲盃正舉行，更係熱上更熱，喺日本官方就專程請來曾執教日本J.League嘅阿仙奴領隊雲格幫手宣傳，可見受重視程度，難怪連《Winning》都要加入領隊元素去抗衡《創造職業球會》。由於暫時未有行貨，貨源唔穩定，機迷要第一時間玩到就要快手。
其實玩家喺《創造職業球會'04》內，唔單止負責球隊工作，連球會業務上發展亦關你事，所以遊戲開始，就要先選擇主場城巿，主場影響深遠，將直接影響到球隊營運成本、人氣以及入場人數，筆者就提議選擇東京附近城巿作主場，雖然維持費用較高，不過可保證每場球賽都有一定入場人數，唔使再花一筆宣傳費，計落都有着數！其次要選擇嘅有靚女秘書、監督、助教、球探等人員，秘書只要合眼緣就可以，監督同助教不妨搵個有實力，貴啲都唔緊要，只要球隊成績好，好快可以回本，至於球探因為球隊初期財力不足，要個一般能力就可以，將來上軌道再換。
球會有落腳點，就到球員相關設定，今集《04》真正可讓玩家擁有一隊自己嘅球隊，首先可替球隊起名，其次就係球員嘅主場同作客球衣，今集配搭有好多變化，即使波褲嘅一條邊，都有好多種顏色，加埋隊章，提議各位花多啲時間，配搭出至型球衣，玩落就更加過癮。
喺度順帶一提，前面選擇唔同嘅監督，會導致有唔同球員組合，而當中又會有一名能力特別強嘅球員，不過當前線強，後防就會弱，相反亦然；如果想彌補這方面不足，就要等到有財力買球員先做到！此外，當玩家玩到第二年，就可以自創一名球員加入球隊，不過起初看來實力唔高，要玩家多加訓練。
因為初期球員實力唔高，訓練項目就提議各位集中練習提高耐力，足球講求體力，耐力夠高都可補一定不足，其次就要練習戰術，由於陣中無乜球星，所以只有靠團體戰！今集代表球員嘅仍然係一個哈哈笑臉，不過有時會出現一個問號，暫時所知代表球員經驗不足，對自己信心不大，解決方法只有一個，就係要畀多啲出場機會。《創造職業球會'04》最經典應係可出現個人或組合式攻門或防守，不過當然要球員同球隊都達到一定水準先有機會見到，一般比賽畫面都有非常高「可觀性」，尤其變化夠多，加上配搭有現場旁述，就好似睇緊現場直播一樣。
電話：25753285
地址：灣仔東方188商場256號舖
