7.1五十三萬港人和平上街，其情景之壯觀，秩序之井然，令人驚歎。遊行路線其實都幾長，中間加插民主派有頭有面嘅人士站台叫咪，同遊行人士互相呼應，效果唔錯，特別係打頭陣嘅鄭家富同張賢登，兩人企喺崇光前面地盤個貨櫃頂，有成幾層樓咁高，認真搏命。
頭頂住烈日，腳踏住鐵箱，叫足六個鐘，阿富把聲終於沙晒，噚日連電話都講得好辛苦，佢話九四年第一次參加區議會試過失聲，今次第二次，老婆大人已經沖咗鹹竹蜂畀佢飲，休息兩三日應該冇事。華叔亦企喺崇光，佢大讚港人愈嚟愈有進步。
壓尾陣嘅梁耀忠就感歎「後繼無人」，事關佢個乖仔，因為細細個時成日遊行，𠵱家聽到遊行就耍手擰頭，話不如留喺屋企歎冷氣。
（圖）鄭家富（左）同張賢登企喺崇光前面地盤個貨櫃頂叫足六個鐘。
傳真︰2623-9278
電郵︰