數據唔錯
一味窩輪：中電9302輪抵買

前日53萬人上街遊行，唔係搞跌個市原因。隔晚美股因為企業消息不利，唔多好睇，令港股開市早段散過一輪。
恒指由大跌234點變為只跌65點，跌幅小兒科。滙控（005）比較失色，收116元，跌1.50元，拖低恒指54點。若然唔計滙控或者滙控冇跌，則恒指只係唔見11點，非常濕濕碎。
相信個市真係冇事嘅話，滙控遲早會彈番上去，揸住銀紙，揀啲低溢價、有成交嘅滙控Call輪買可也。
拖低恒指第二多嘅藍籌，好多人估唔到，原來係中電（002），收42.10元，跌60仙，不過都只係令恒指唔見5點而已。中電一向波幅細過好多其他藍籌，有時遇啱忽然跌得多啲，就要諗吓Call輪，9302相當抵買，12月到期，輪價51仙，負溢價0.3%，槓桿率8.3倍。負溢價係因為正股派高息，有成4.8厘，計埋冇息因素，隻輪有少少溢價，都係抵買。
中鋁（2600）生猛，由最低位抽上4.225元，進帳5仙，兩隻Call輪打入龍虎榜。

9214壽命短溢價高
中鋁Call輪9214收27仙，升18%，月底到期，溢價7.7%，槓桿率15.6倍。另1隻9253收66仙，升12%，8月尾到期，溢價7.5%，槓桿率6.4倍。兩隻輪尚餘壽命有限，以高溢價揸貨，唔值得。睇好正股，應直接買正股。
章盛