一度被股東否決批股計劃的安德利果汁（8259），終於喺上個月底公布配售新股。雖然隻股係創業板股，兼夾又係民營企業，但據講批股一事獲得芬佬支持，部份有貨嘅基金更即時加碼，睇嚟對公司相當有信心。
經紀黃話，安德利今次透過某間常替民企批股嘅歐資行，以每股0.80元配售1.785億股新H股，集資成1.428億元，主要用於建設新生產設施之用。雖然金額銀碼唔算細，但以該間歐資行嘅實力，照計唔會搞唔掂，中短線股價可看好。
安德利噚日升1.12%，收0.90元，成交股數229萬股，金額205萬元。
另外，自從莎莎國際（178）及堡獅龍（592）等零售股公布業績都靚爆鏡後，零售股受到追捧，其中主要賣女裝嘅威高國際（1173），噚日炒高10.9%，收0.233元。隻股向來冇乜成交，但噚日都有866萬股，金額198萬元。
隻股將在7月6日公布全年業績。經紀黃話，聽聞公司業績唔係特別標青，但據講派息方面就會幾好。
慕容小初