周杰倫同杜汶澤前晚喺日本嘅榛名山拍《頭文字D》，不過喺電影入面呢個地方就會跟原著叫秋名山，做《頭》片入面嘅主角藤原拓海嘅周杰倫，佢揸嗰架豆腐舖戰車AE86終於曝光，導演劉偉強話為拍呢部戲已經炒咗幾部車，每架都要十幾萬，重未計改裝嘅錢㖭。因為喺山邊拍賽車戲都幾危險，所以唔少場面要用替身上陣，為安全計，重請埋師傅喺現場check車同埋有醫療戒備隊㖭。
周杰倫同日本妹鈴木杏喺戲入面係情侶，佢話大家平日都用英文溝通，自己英文唔係咁好，所以要好辛苦咁諗英文單字同對方傾偈，但鈴木杏就好有耐心聽佢講嘢，周杰倫重讚鈴木杏可愛㖭。
至於杜汶澤，呢次日本之行就真係大出血，事關佢早幾日趁空檔去咗裏原宿買嘢，因為坐火車比坐車快成兩個幾鐘，所以佢就搭火車去，點知去到火車站，見到幾百個車站名就儍咗，卒之迷失東京，搞咗幾個鐘先去到，行完街之後，佢驚自己返去時又重蹈覆轍，於是走去搭的士，一上車司機就哇咗一聲，最後佢搭咗成五萬日圓（三千五百多港元）至返到去，馮仁昭都知阿澤呢兩年搵到錢，但都唔係咁樣嘥呀！
蔡少芬早前續約護膚品牌擔任代言人，又同內地演員張晉傳緋聞，重被人撞破同遊嶗山㖭，佢同張晉近日忙緊喺上海拍攝新劇《上海灘之俠醫傳奇》，有傳言話係蔡少芬力薦張晉演出《上》劇，她噚日用國語話：「如果真是這樣，我可以去當經理人了，我可以讓所有朋友都來拍戲。」提到佢嘅緋聞時，蔡少芬話：「感情的事我不想說有還是沒有，我不想交代。」但蔡少芬就大讚張晉好人、工作認真，兼對家人同朋友都好好。
劉錫賢噚日到葵青劇院出席舞台劇《不可兒戲》記招，呢次係佢首次喺舞台劇度反串做女人，佢重要着上十幾磅重嘅戲服，所以劉錫賢話：「淨係化妝都要成粒鐘，啲戲服好焗，唔夠五分鐘我都已經成身汗，真係好辛苦，不過最慘係要我背四十幾頁台詞，我放低個書包成二十年嘛，所以好難記。」咁咪重好，可以乘機減吓肥囉！
金城武出道至今都拍過唔少戲，亦錫過唔少女星，佢自己接受雜誌訪問時就話最深刻係拍《墮落天使》時錫李嘉欣同楊采妮，提到拍《十面埋伏》時錫章子怡，金城武就表示好怕對方以為自己要佔便宜，又驚錫落去會好奇怪，令佢都好手足無措，但無論同邊個接吻，佢都會同對方講對唔住喎。
藝能張國忠最近簽咗位新人叫姜文杰，原來佢係秦沛個仔嚟嘅，姜大偉同爾冬陞嘅姪，𠵱家做咗黃伊汶師弟，日前黃伊汶重特登請師弟食雪糕，佢忠告師弟入行要潔身自愛，千祈唔好染埋啲不良嗜好。姜文杰送番幅自己畫嘅畫畀師姐，佢重話：「我老竇食煙我都覺得好臭，所以我一定唔會掂嗰啲嘢。」
