雞胸肉口口聲聲話自己係減肥者肉食之寶，但點解一時每件467Kcal，一時只剩45Kcal？答案係兩個都啱，純因兩者份量、肥膏、煮法有別，所以先至出現10倍超勁熱量差異！還有，叫句少甜，一杯凍檸茶到底又可以少幾多卡路里？諸如此類的問題，都推翻細時阿媽教落「唔好揀飲擇食」的訓話！時移世易，食物都要鬥瘦，即醒你擇善而食基本法。
記者：李玉蘭 攝影：伍慶泉
想瘦身當然首選自己煮，少油少鹽都是金科玉律。而且還可專攻「熱量密度」低的食物來下廚。即是說進食性質相近但熱量較低的食物。如選雜菜湯避忌廉湯、用瘦肉棄肥肉、湯河勝炒河……但除這些外，下廚時切多刀切少刀，原來都可對卡路里帶來變化，你又知唔知？
咪以為自己刀法如神將食物切得懶精緻。想瘦？就要記住大嚿切這入廚必殺技。以一個50克重的薯仔為例，其熱量本身為39Kcal，將佢切成4片做炸薯皮，熱量變為48Kcal，但係將佢切細變成幼條炸薯條，熱量就會勁升至126Kcal！
大嚿炸薯皮48Kcal
小嚿炸薯條126Kcal
同一道理，其他食物，尤其是蔬果，就更要大嚿切。因為蔬果一類水份高的食物，都絕對是吸油大師。好似一個100克洋葱本身只有35Kcal，但經油炸後，熱量會標高達355Kcal；一個75克茄子有14Kcal，原條油炸之後達109Kcal！如想控油，切洋葱就愈大粒愈好，以減低總體積吸油量；又比如煮茄子時，可以煮到中途時加湯或加水煮；而煮好餸菜時，甚至可以用吸油紙吸走油份。
當然，少用油炸是最徹底的控油法。煮食時可以多使用蒸、燜、焗、上湯等煮法，甚或將一片片肉放入小火鍋烚吓烚吓，讓肉食脂肪全留於湯面，自然食得放心！
炒大鑊原來都有助減低卡路里。以只有40Kcal的200克菠菜為例，用一個直徑32cm的中式鐵鑊大火快炒煮熟，熱量係147Kcal，但改用一個直徑26cm平底鑊，因面積較細、鑊面翻騰空間較小，熱量就多了37Kcal而達184Kcal！
雖然雞肉於肉食中卡路里已經叫低，但係人都知，先去皮、去肥就可食瘦你。原來約重230克的連皮雞胸肉，有467Kcal，去皮後只剩228Kcal；脂肪含量更由28.3克大幅下降至4.6克！
邊有咁理想，可以日日為自己炮製大餐！可惜係食肆為求吸引顧客、增加食力，少不免加油加鹽加多多熱量，所以出街食要格外小心！以下重點列舉幾項出街食較常會遇到的卡路里差別。
絕大部份蔬菜每100克所含熱量都不會超過40Kcal，但大部份食店油菜熱量都高達90-140Kcal，相差可達1-3倍！熱量飆升當然同煮法有關；所以千萬要叫走油！而每100克計，以生菜最低卡，只14Kcal，其次是白菜，有17Kcal，芥蘭相對較肥，有25Kcal。
湯汁乃精華所在，所以別因饞嘴而搏命飲！又以一碗日式炸蝦蕎麥麵來說，發現兩件炸蝦熱量係162Kcal，大大個蕎麥麵熱量係224Kcal，估你唔到嘅係睇落清清哋的蕎麥湯汁都有成62Kcal！
油菜走油之餘，不忘走埋蠔油。因為每湯匙蠔油，有成32Kcal！其他醬料亦要注意，好似醋的熱量雖然低（只3Kcal），但卻能令你好開胃，不妨睇睇以下醬料卡路里，等你心裏有數。
其實家陣十個有九個女仔，都會叫「凍檸茶少甜」！普通一杯凍檸茶，起碼66Kcal，叫句少甜，就得番36Kcal。少30Kcal落肚好似唔算多，但其實熱量差成半！而加唔同糖又有不同熱量，可參考下表。
另外，水、綠茶同齋啡就最清減，因為都是0熱量。熱檸水及熱檸茶的卡路里都不過10，但咖啡、奶茶、華田都有約170Kcal，紅豆冰更有成317Kcal。想瘦？知點揀啦！
蛋、牛奶、柴魚含苯丙氨氯酸；醋、芝士、牛肉含比咯氨酸；四季豆、芝麻、豌豆含賴氨酸；糙米、堅果、豆腐皮含精氨酸，這4種酸都可燃燒和分解身體脂肪。
高纖維食物包括金茹、竹笋、毛豆、芹菜，海帶、蒟蒻、糙米、蔬菜等，可以刺激大腸壁肌郁動，幫助清除廢物。胃部吸收水份又會令纖維膨脹，產生飽肚感，簡直一舉兩得！
不論你多急於減走肥肉，每日吸收熱量不可少於1,000Kcal；若果為瘦而令每日熱量吸收低於800Kcal，可能引致營養不足及基因代謝率下降，之後多吃一點點都會快速復胖！
進食次序以先飲湯或清水打底（胃病者除外），才開始食蛋白質食物、脂肪類食物、蔬果，最後才食澱粉質；就可以減少食慾和胰島素分泌，令減肥大業事半功倍。
