日本水着女星小倉優子以其煞食「妹系」look，喺日本藝能界殺出一條血路，最近有日本漫畫出版社搞咗個大型宣傳活動，搵咗小倉做代言人，扮成多個出名嘅漫畫人物，當佢着校服扮五歲幼稚園小妹妹嗰陣，真係cute到爆！
日本出版社集英社今個夏天會搞個大型漫畫宣傳活動「NATSUCOMI」，出版社已經搵咗小倉優子擔任代言人，拍攝多款宣傳海報，鋪天蓋地咁貼喺日本車站同書店裏面。雖然啲海報要下個星期先至正式出街，但我大口羅拉已經搵到三款小倉拍攝嘅造型，極之頂癮。
小倉優子成日都話自己鍾意玩cosplay，攝影師於是畀套幼稚園校服佢着，將佢扮成槙陽子筆下少女漫畫《愛你寶貝》入面位小妹妹主角，雖然小倉已經二十歲，但扮起五歲小妹妹嗰陣，又真係幾神似，難怪佢係日本妹系水着偶像嘅代表，小倉話：「最初見到要着幼稚園校服影相嗰陣，真係覺得醜死鬼，好彩出嚟嘅效果好，令我好開心。」
除此之外，小倉亦扮咗兩個本地漫畫迷都好熟識嘅漫畫人物，佢無論係扮《NARUTO狐忍》定《GANTZ殺戮都市》嘅主角，都係咁似模似樣。