期指結算後，大市走勢果然出現突破，恒指創出今次反彈新高，短期可向月中高位12500水平推進。
恒指噚日最高見12328，升212點，午後雖有回吐壓力，但高位承接力仍強，以12285收市，仍升169點，成交則增至148億元。期指升勢更急，進帳220點，由低水轉而為輕微高水。
國指最高4347，曾上升110點，午後國企跟大市回軟，結果以4291收市，升53點，成交30億元，增36%。大行買國企，仍然係好積極，之但係搶得太高之時，佢哋又會停一停手，睇動態，佢哋家吓重係收集緊，唔想國企大升住。好似噚日，國期原本曾升過120多點，但一段時間急回，只起得20多點，收市重低水30幾點，但呢段期間，唔見啲主力國企股有大手質貨嘅鏡頭出現，若要提嘅，都只係上海石化（338）試過見大行質過兩手百零萬股嘅貨，雖然係咁，收市仍有大盤高位掃成球貨，結果收2.6元，升4%；其他國企多有兩三個位進帳。
其實，國企走勢好多都已出現突破，若大行收集完成，升浪一起，相信會升得好急。
‧兗州煤業（1171）升破頭肩底形態後，完成後抽整固，現時在8.65元至8.2元間形成旗形，整固後再上，目標指向10元。
‧鎮海煉化（1128）走勢同兗煤相似，破位後短線可見9.1元，中線上升目標亦係10元。
‧北京燕化（325）已升破2.5元阻力，初步量度上升目標3.0元。
‧上海石化暫時仍受制2.6元的3頂阻力，相信可破位而上，中線向3.3元水平推進。
‧安徽海螺（914）形成複式雙底，近日在8.3元至8.6元間旗形整固，係近期表現較為落後的國企，若確認升破20日線（8.65元）及50日線（8.95元），初步目標係10元；整固後再上，複式雙底的上升目標係13元。
‧中國鋁業（2600）升破降軌，相信50日線（4.276元）的阻力唔大，破位後目標指向5.1元。
‧3隻鋼鐵股亦係蓄勢待發，馬鋼（323）、重鋼（1053）同鞍鋼（347）確認突破後的短期目標分別為3.1元、3.4元同3.4元。
郭兆誠