由於買家入市意欲薄弱，業主若要出貨，最有效方法惟有減價，近期就多咗業主數度降價賣樓。
中原謝寶昭話，將軍澳新寶城，有業主五度減價，先至可以賣出單位，呢個六座中層H業主，四月初放售單位，叫價二百七十五萬，市場全無反應，五月又撞正房協低價重推怡心園，業主兩度減價至二百五萬，一樣冇人問，到六月市況重差，惟有再三度減價，終於以二百二十五萬成交。
聽講，買家第一次還價二百二萬，業主話要二百三萬，但個客都幾實在，還咗兩口價，業主就肯賣。呢單成交價比市價低一成。
謝寶昭話，近期多咗業主主動減價，好似上周末，有部份業主親自到分行，話肯減三至五個巴仙；若果買家有誠意，議價幅度重可以由三至五巴仙，擴闊至一成。
西鐵通車後，交通獲得改善，理論上對樓市有支持，但祥益發現六月成交大減三成二。
祥益謝澤銘話，屯門雅都花園及荃灣廣場都冇成交；而天水圍嘉湖山莊，只得四十三宗，比今年高峯少五成七，成為今年成交量最少的月份，而呎價都急跌兩成半。他補充，西鐵通車半年，沿線物業成交逐步上升，上月因已超賣才急跌。
不過，謝澤銘預期，西鐵沿線物業已跌穿支持位，再跌五巴仙至一成，會見承接。
加息成為熱門話題，令樓市受到一定壓力，中原發表報告，話家庭入息中位數近萬六，供樓負擔比率係二十六點五巴仙，若加息四分一厘，都係升到二十七點一。
就算加半厘，供樓負擔比率為百分之二十七點七，每月增加供款，只係一百九十八蚊。比率相對九七高峯期的八十二點九巴仙，重低好多。
結論唔使問，梗係加息對樓市影響極其輕微。
中原以四百呎單位，六成按揭及二十年還款期計算負擔比率。
薄扶林怡林閣向來多外籍客捧場，美聯梁浩威成功推介一個筍盤畀外籍買家，成交價比市價略低八個巴仙。
梁浩威話，怡林閣有海景有露台，連車位呎價唔使四千蚊，理應抵買，不過本地客唔吼，反而吸引外國人買，原因係物業夾喺兩個墳場之間，本地買家對呢類物業通常避之則吉，相反，外國人冇咁介懷，反而鍾意嗰度環境夠靜，現時屋苑佔咗一半住客係外國人，佢哋有租有買，啱啱成交嘅D座高層，千二呎，成交價四百二十五萬，每呎三千四百幾。
美國電腦業巨擘Microsoft，近期人氣急升，成為地產界話題。
由於Microsoft個中文名係微軟，咁啱同現時樓市一樣，所以行內人士講起個市，就Microsoft前、Microsoft後嘞，可能幫蓋茨改中文名嗰位人兄，發夢都估唔到會咁樣俾人借用法。
業內人士話，呢個「微軟」市，業主唔肯大幅減價，買家又唔肯點追價，搞到買賣兩閒，做中間人嘅代理就最頭痛，皆因生意少，點樣交數呢？
蘭西
電郵地址：
