7.1前夕，風雨欲來，今日大家上唔上街都好，至緊要唔好失憶，重溫吓好多自稱愛國愛港嘅人士，對於香港嘅時局，曾經記錄在案，有過乜嘢異乎常人嘅見解。
合和主席胡應湘：「百萬人在香港遊行，中央就會怕了嗎？中央也可以組織十三億人上街，國有國法，家有家規！」
港區人大代表鄔維庸：「以前香港人有拼搏精神，𠵱家冇晒，冇嘢㗎，俾人餵狗餅餵壞咗。」
政協代表兼瑞安主席羅康瑞：「如果唔鍾意，咁就唔好喺度住！」
人大代表王敏剛：「如果7.1重去遊行，就係大逆不道！」
人大常委兼金利來主席曾憲梓：「話佢係賣國賊兼漢奸，都唔足夠（指李柱銘），佢實在冇資格做中國人，可惡！可惡！」
7.1前夕，以上嘅獨白，忽然全部消失，令人反而有少少懷念。因為，入鮑魚之肆，久而不聞其臭，久而久之，冇咗陣惡臭味，反而令人覺得周身唔聚財。
不過，幾乎可以肯定嘅就係，若果今日得嗰一兩萬人遊行，好快好快，以上同一班人，又會出嚟再講過嘢，佢哋會講乜呢？可能有以下嘅精句：
「既然重有人遊行，中央都係唔好搞咁多自由行嘞，嘥晒啲狗餅！」
「都話咗遊行人士係受人誤導喇，嗱嗱，係咪呢，得嗰兩三萬咯，抵死喇。不過，我哋愛國同胞歡迎今年嗰四十七八萬冇再遊行嘅市民擺脫誤導，改邪歸正，歡迎佢哋九月投票投畀民建聯！」
「嗰啲參加7.1遊行嘅，全部係心理唔平衡失敗者，係分裂祖國顛覆國家
做人唔可以失憶。或者由於曾慶紅下令，有啲人，一時嘅收口，對眼望咗去第度，唔代表佢哋乜都冇做過，乜都冇講過，同埋乜嘢事都冇發生過。若果唔係，我哋就永冇資格譴責日本篡改小學教科書，抗議日本否認有南京屠殺。
呢啲人嘅嘴臉，要認住，呢啲人嘅言論，要記住。堅持記憶，把握現在，才可以邁步走向未來。
傳真︰2623-9278
電郵︰