今日除咗有大遊行之外，重有回歸慶典，市場又傳出中央會公布有好嘢益香港，例如落實QDII或保險資金來港等消息，加上半年結櫥窗粉飾效應及美股上升的支持，港股噚日借勢反彈，大升169點，收報12285，成交金額增至148.66億元。
第一亞洲資本（1227）由3月15日開始停牌，大股東悉售24.74%股權予信用卡防盜（1051）主席黃金富後，噚日復牌，股價好似被斬倉咁大挫，曾急跌83.65%至0.26元，最後收報0.445元，仍跌72%，不過成交僅468萬元。
第一亞洲資本通告未披露交易作價。黑客話，該股5月底止的每股未經審核資產淨值只得0.16元，停牌前股價高企在1.59元，聽聞主要是因為幕後齊心。
今次大股東悉售24.74%股權，公司主權易手，斷估黃金富都唔會出高價接貨，而其他股東見黃金富入股後，唔知以往股份歸邊情況能否繼續保持，唔排除有人會先沽貨自保。合一投資（913）見到第一亞洲資本咁跌法，亦好似趁高興齊插水，跌21.3%至0.18元。阿虎心諗，照計合一在5月底，每股資產淨值有成0.42元，冇必要咁跌法。
噚日有3隻新股上市，就算表現最差的大新銀行（2356），亦可以守在招股價之上收市，報12.80元。不過佢阿媽大新金融（440）就續有沽壓，跌2%，收46元。
有唔少大孖沙畀面支持嘅勤＋緣（2366）就令唔少人跌眼鏡，雖然一度高見1.50元，但最後回至1.32元收市，較招股價僅高出3%。
反而青浦消防（8115）就較招股價高出16.67%，收0.63元，是3隻新股中表現最佳。
阿虎