喺電影《哈利波特》系列度飾演妙麗同榮恩嘅愛瑪屈臣（EmmaWatson）同埋路柏格連特（RupertGrint），啱啱去日本宣傳電影《哈利波特阿茲卡班的逃犯》。前日佢哋重同Johnny事務所旗下嘅組合，包括NEWS嘅小山慶一郎、KAT-TUN嘅龜梨和也同赤西仁、同埋Johnny'sJr.嘅Mackey見面，嚟一次英日交流咁話。
雖然最初因為語言障礙，搞到小山慶一郎同龜梨和也有啲緊張，但係佢哋慢慢放鬆咗之後，重好鬼多嘢講㖭。赤西仁就好識講嘢咁話：「愛瑪真人好成熟，比電影裏面嘅佢更加靚女。」
努力學緊日文嘅愛瑪以簡單日文作自我介紹，佢話日前啱啱去完涉谷shopping，又食過日本料理。被問到喺四位靚仔當中最鍾意邊個時，愛瑪就突然變得非常怕醜，重面都紅晒咁話：「大家都咁靚仔，好難揀呀！」
最後，一班Johnny仔重邀請愛瑪同路柏去睇佢哋嚟緊喺八月嘅演唱會，但愛瑪同路柏就話佢地要拍哈利波特第四集，所以去唔到喎。