亞視近年都好少製作自己嘅節目，做宣傳就幾乎次次都搵嗰幾位藝員上陣，我馮仁昭覺得「亞視一姐」陳煒就已經成為宣傳活動嘅台柱。
亞視呢排着手籌備《亞姐》選舉，佢哋呢次重打算吸納一班內地靚女，亞視日前安排咗前亞姐冠軍陳煒去杭州宣傳造勢。
陳煒、珈潁、麥家琪同陳秀雯等，前晚去咗尖沙嘴出席「亞洲電視邁向48週年員工聚餐」，其間陳煒投訴亞視將《亞姐》嘅宣傳任務集中喺佢身上。
陳煒話：「公司唔係得我一位亞姐，我都想同公司反映吓，次次宣傳都冇錢，又唔計騷，公司重話九月又叫我去內地做地區選拔賽嘅評判，我希望公司可以體諒吓畀啲車馬費，因為去宣傳扮靚同置裝都要錢。」此外，陳秀雯對於有份主演嘅劇集《愛在有情天》收視唔錯，佢話：「我都知呢套劇好慢熱，收視可以穩步上升都OK啦！」
張佩金早前喺上海遇車禍重傷，𠵱家出咗院喺上海休養，問佢有冇打算出書將自己嘅經歷寫出嚟？佢話：「都有人聯絡過我，我都希望鼓勵香港人要珍惜生命，不過我嘅中文唔叻，或者自己口述，搵人筆錄。」
張佩金嘅醫生話佢嘅盆骨冇問題，唔會影響將來生育。張佩金又話伏明霞都有打過電話問候佢同男友Harry。
鄭希怡（Yumiko）噚日去九龍灣國際展貿中心演出音樂會，對於吳浩康老竇被起底，喺茶果嶺開運輸公司，Yumiko話自己喺慈雲山亦幾有名氣，佢話：「嗰度人人叫我瓊姐，因為我讀書時用真名鄭列瓊，點知學校個校工都叫瓊姐，我入咗行改叫鄭雅文，之後再搵相士改咗鄭希怡，吳浩康都係相士幫佢改嘅。」
劉德華喺九月嘅演唱會喺銀行嘅優先訂票一早爆晒，未買到飛嘅歌迷要下星期五（九日）去排隊撲飛。噚日馮仁昭去紅館睇許冠傑，見到幾個華仔歌迷打地鋪排隊，排頭位嘅小姐話佢同班朋友由星期日開始輪流排隊，華仔知道之後話：「千萬唔好為買飛而影響健康，要有健康身體先可以嚟睇騷㗎！」
戴夢夢噚日喺沙田出席港台「戲曲天地龍翔再現顯光輝」活動，參與演出話劇，重大耍纓槍，但係被前輩譚倩紅大彈冇姿勢亦冇實際。戴夢夢話：「紅姨見我耍纓槍，佢笑我耍到好似掃地咁喎！」
關心妍噚日喺沙田出席港台活動，夜晚重同陳任合唱英文粵曲。對於傅珮嘉近日言論出位，負面新聞不絕，關心妍話體諒對方要承受好大嘅壓力，但言多必失，佢希望大家都係專注音樂，以和為貴喎！
黃湘怡日前喺台灣出席化妝品牌植村秀嘅活動，為咗顯現夏日風情，黃湘怡特登着咗件好燦爛嘅粉紅色衫上陣，打扮可愛，佢話有個護唇秘方，就係每次刷完牙之後，用牙刷喺唇上刷幾下按摩雙唇，順便刷甩啲死皮，之後再搽潤唇膏保濕。咁睇嚟佢都要刷得好有技巧，否則容乜易刷到流血㗎！
