香港夏天雖然熱，不過唔少好有熱誠嘅後生仔唔怕烈日當空，三十幾度都去打街波；（唔信？你禮拜日下晝走去維園睇吓就知）我更加見過有啲着住牛仔褲嘅都照打，打完條褲真係扭得出水㗎！
其實打波又好、出街又好，最緊要就係着啲鬆身、透氣同輕巧嘅衫；好似最近一剔牌就出咗幾款奧運隊同「戰場」系列嘅波衫同波褲，夠晒透氣同輕身；而且批衫嗰款幾好睇，就咁着出街都OK！
有啲人可能話唔着衫咪重好，千祈唔好㖭呀，一來易曬親，二來成班球員身水身汗又唔着衫，好唔合衞生。
除咗波衫，夏天有唔少人都會着短褲出街，假如你同我一樣係籃球鞋「死硬派」，咁夏天就係低筒鞋出場嘅時候。好似筆者近期就至愛飛人牌十八、十九代低筒。
呢兩對鞋原裝版雖然舒服，但就嫌重咗啲，而且價錢幾「揦脷」。低筒就唔同，夠輕之餘價錢又平一截，而且夠晒通爽；前者喺大嘅運動連鎖店賣緊六百幾蚊，後者喺波鞋街都係八嚿水，呢個價淨係買個「鞋底」同TechFlex鞋掩都抵喇！假如唔係有啲突兀嘅「裂紋」，直頭係今夏bestbuy！