七一遊行前，港股急升先賀一賀，恒指彈跳169點，果然前日期指低水唔代表個市向下。個市升得相當全面，33隻恒指成份股，只有電盈（008）同港燈（006）冇得升。
龍虎榜上排頭位嘅係華創窗口定界輪9350，收3.7仙，升42%。幾千蚊成交金額，冇意思，3個禮拜後冇得玩，買嚟嘥氣。華創（291）收9.45元，升1.6%，幅度唔大，睇好正股嘅話，9564勉強可以諗吓，明年6月到期，輪價20.4仙，溢價24.0%，槓桿率4.6倍。數據唔算特別靚，但其他同類輪更揀唔落手。
九倉（004）升2.8%，跑贏大市。鎖定回報輪9178收13.8仙，升33%，有18球成交，唔係乾升。正股郁，非標準輪只要壽命夠長，表面溢價唔離譜，一樣會跟正股郁。標準輪9086收49仙，升11.4%，11月到期，溢價0.8%，槓桿率4.6倍，仍然諗得過。
和黃（013）升1.9%，又係跑贏大市，Call輪9365升30%，上龍虎榜，不過只係代表由2仙彈上2.6仙，成交金額兩萬元咁大把。下月初到期，行使價62元，最後飲雪水機會好大。炒和黃Call輪，應揀壽命長的嗰類。
國泰（293）升3.2%，收14.70元，Call輪9292按盤價升25%，冇意思。買國泰Call輪，9170最實際，年底到期，輪價26.5仙，溢價3.1%，槓桿率5.5倍。
章盛