呢個月，香港舞台幾熱鬧，歌神許冠傑演唱會轟動全城，紅館晚晚座無虛席，另一邊廂，文化中心上演世界聞名嘅歌劇《MammaMia》（澳洲劇團主演），吸引大批外籍觀眾。如果香港要維持一個國際城市嘅地位，外國歌劇不妨多啲演出，既可滿足遊客，又可令本地人睇到國際級表演，而本港外國居民唔使抱怨香港日益中國化，悶死佢哋。
大編輯得贊助商國泰航空招待，睇咗一場《MammaMia》之後，大呼過癮，於是自掏腰包，買咗四張飛，請埋左丁山去睇。對於ABA啲歌，左丁山一向鍾意，呢隊瑞典四人組合喺一九七四年四月六日贏咗歐洲歌唱大賽冠軍之後，紅極一時，佢哋啲歌清新悅耳，首首熱情澎湃，令人聽得興奮。樂隊有兩男兩女，兩男就係兩個B，BennyAndersson與BjornUlvaeus，呢兩位仁兄自樂隊喺一九八二年拆夥之後，一路構思一個歌劇，以ABA嘅歌曲為基礎，一九九七年一月正式召集人馬寫劇本，到咗一九九九年四月六日（ABA得歐洲歌唱大賽冠軍嘅二十五年紀念日），《MammaMia》在倫敦首演，一出便轟動，成為現時全世界最賣座嘅現代音樂劇，每晚演出，觀眾都會全情投入，企起身，迎合音樂拍子，扭動身軀。
左丁山入場之夜，文化中心大劇院約七成上座，最貴嘅飛就冇晒位，「山頂」就大把空櫈。演到最後，九成觀眾（包括左丁山與大編輯）全都企起身拍掌，郁身郁勢。前座第一排有一位男士，好似怕失儀態，繼續坐。企起身就冇人覺，坐喺度，好突出啫，望真吓，呢位男士係第三屆特首熱門之一，吳光正先生是也，吳太與朋友葉麗儀夫婦，冇乜政治考慮，都唔知郁得幾高興。