近排住宅市道表現麻麻，工商舖都係一般，業主若要出貨，自然要想辦法，所謂「重賞之下必有勇夫」，所以畀高佣金係最有效方法。
市場消息話，中原地產剛被委託代售灣仔298電腦商場一籃子六十個舖位，佣金重幾和味，有成四巴仙，比住宅的一至兩巴仙吸引好多。聽代理講，有時業主想快啲出貨，都會畀高佣金促銷，以往就試過有商舖交易佣金達一成。
聽講，呢批舖位集中在二樓，早排由單一投資者掃入，今次拆散發售，每個舖面積由六十幾至四百幾呎，每方呎叫價四千幾蚊起，入場費大約三十幾萬。中原地產講，現時灣仔區做電腦的商場舖位，放盤唔算多，由於盤源少，租金回報率都算吸引。以298商場為例，呎租約四十蚊，回報率約八至十二厘。
中原一姐劉瑛琳嘅新書上周登場後，本周輪到主席施永青嘅「政經敢言」出版，初步反應幾理想，重有好多有趣事發生㖭。
話說中原預備咗二百本書，憑印花換領，噚日上午十時搞簽名會，誰知九點未到，第一位讀者劉太已到場。二百本書一小時派完，中原決定加送五百本，並為二百幾名向隅客做登記，下周一送出。每本都有老施簽名。
現場有十幾位讀者，換完書唔肯走，原來係想同老施影番張相；據講其中一位重係外資銀行助理董事。蘭西聽聞，有發展商售樓部高層都查詢想攞本睇，搞到中記高層要四圍張羅。
另外，有在深圳工作港人致電，查詢可否由他人代領取，而下午更有讀者上門要求買書，中原又點會拒絕，結果率先賣出第一本。反應咁好睇嚟都唔憂賣，可能好快要再版㖭。
美聯主席黃建業上禮拜賺三百幾萬，賣出年頭入嗰間跑馬地禮頓山豪宅後，食髓知味，決定招標出售同期買入的渣甸山軒德蓀道十二號大屋，八月十二日截標，意向價超過一億。如果成功甩手，可勁賺三千幾萬。
美聯何璦麟話，間屋佔地一萬呎多啲，兩層高，大約六千呎，有九間套房，車房可泊十部車，比現時住緊的山頂種植道豪宅大得多。原本老闆打算自住，裝修咗幾個月，工程已接近尾聲，點知佢個女突然決定去外國讀書，得兩夫婦唔使住咁大間屋，先至放盤。
入伙幾年的荃灣愉景新城，有三千三百幾戶，只得六百七十二個住宅車位，需求自然殷切，但商業用的車位就慘不忍睹，有好多空置，搞到發展商兼停車場業主的香港興業好頭痕。最近諗到計仔，將空置嘅停車位轉做臨時私家車展覽室，重啱啱獲城市規劃委員會批准。
個臨時展覽室只佔七樓停車場部份樓面，五萬二千呎，為期三年，只要香港興業向地政署繳交短期豁免書費用後，就可以開業，估計費用閒閒地都要幾十萬。蘭西諗，現時市場都有幾個汽車展銷場，部份設於觀塘或九龍灣工廈區，唔知香港興業有乜噱頭同佢哋爭客呢？
在英國開業近一個世紀的萊坊國際物業顧問，全球三十多個國家有超過二百個辦事處，聘用九千多人，其中在地少人多的香港開業超過二十年。
新上任港區話事人霍志禮向傳媒講，亞洲區係未來十五年發展重點，特別睇好香港，要大展拳腳，準備請多六至十名經紀搵銀。數量比起地頭蟲華資大行可能係小巫見大巫，但以萊坊香港的規模而言，比例算係高，單以佢現時的經紀隊伍計，增幅接近兩成，所以真係用行動證明，佢哋睇好香港物業市場。
蘭西
電郵地址：
