蘇永康、吳啟華、王傑及鍾欣桐等，前日在上海拍攝電視劇集《俠醫傳奇》，曾在台灣接受勒戒的康仔，以過來人身份大談涉嫌藏毒被捕的吳浩康，他希望外間給予吳浩康空間，現階段他亦應畀心機工作。 記者馮美茵上海直擊
蘇永康前日在上海拍攝新劇《俠醫傳奇》，早前曾在台灣接受勒戒的康仔，提到英皇歌手吳浩康涉嫌藏毒被捕一事，即以過來人身份希望外間盡量給予吳浩康空間。
康仔說：「畀啲空間佢，呢段時間唔知內情最好唔好出聲。」吳浩康曾就事件公開道歉，對此康仔說：「更加要畀個機會佢，𠵱家佢重有得拍《學警雄心》都好，最緊要有嘢做，千祈唔好停。唔好定斷事件真或假，要留畀警方去搞，佢好多壓力，出面太多蜚短流長嘅說話，我都感受過佢啲處境，除咗自己之外，身邊家人同朋友都好辛苦。」提到可有甚麼寄語吳浩康，康仔說：「畀心機工作最重要，我唔會定斷佢有冇犯錯。」
對於好友吳國敬承認曾吸食大麻，康仔說：「呢個社會不嬲都好多引誘，我犯過錯，唔代表我身邊朋友都係，我哋嘅生活除咗工作，重有正常活動。」王傑亦聽聞吳浩康涉嫌藏毒，他說：「我話娛樂圈冇引誘就呃你，但我絕對唔會揩，我係唔會吸大麻，由細到大都好憎。」
吳啟華早前在港接受訪問時向記者發脾氣，他前晚即公開道歉，吳啟華說：「上次我啲態度唔係幾好。」吳啟華早前在北京懷疑召妓，令形象受損，有傳他在無綫新劇《妙手仁心III》中的戲份因此被刪減，他否認說：「嗰啲新聞公司都冇信。」
此外，吳浩康昨日接受薛家燕主持的節目《家天下》電話訪問，吳浩康說：「呢件事媽咪佢哋冇鬧我，只係有少少𤷪𤺧，令我覺得羞恥，佢哋個仔出咗事個心咁難受，但仍然顧及我感受。呢件事令我好內疚，我覺得係好大嘅事，但經一事長一智，我會吸取今次嘅教訓。要玩，唔係玩呢啲，亦玩唔起。我之後會勇敢企出嚟，雖然未必得，但我繼續爭取唱歌。」