為減少刺激市民上街，北京同左嘴非常忍口，大家笑笑口話要釋出善意，講到可以即刻派回鄉證畀民主派人士返大陸咁款，上星期港進聯飛天豬聲稱拎咗份「特赦」名單上京，至今冇下文。
自由黨又想抽水，主席田少話指派身兼人大嘅黨員、香港總商會中國委員會主席李大狀上京探路，希望可為民主派同中央溝通搭路，不過自由黨老友直言此行其實得啖笑，因為中央同民主派溝通十畫未有一撇，「如果真係成事，就由田少親自出馬啦。」
田少為人精明，呢啲咁敏感嘅事自然唔會貿然出手，而聲言會出選新界西嘅副主席周梁淑怡，近期安排咗連串落區行程，今個星期六開始有個反家庭暴力花車巡遊，總之就大灑金錢搞多場大騷壯大聲勢，其實自由黨每逢選舉都係出呢招，但係選民眼睛雪亮，搞好地區工作先至最重要。
傳真︰2623-9278
電郵︰