想7.1少啲人遊行，有好多辦法，當然唔可以好似舊年咁，靠民建聯工聯會組織慶回歸文藝會咁屎橋。重記唔記得特異功能嘅國寶嚴新大師？據說佢可以喺北京遙距發功，救熄東北興安嶺嘅森林大火。颱風蒲公英一度逼近香港，由祖國特異功能大師一招「萬佛朝中」，向天發功，一嘢將個颱風改變方向，由移往台灣、轉埋身擊向港島，7.1嗰日掛十號風球，就冇人會上街。
或者六月三十日，與7.1交接嘅零時，九鐵宣布同深圳合作，由特區政府撥用儲備補貼，實行「中港廿四小時通宵優惠吃喝玩樂遊」。凡香港人憑身份證，可以搭免費車，去到深圳，沖涼揼骨、飲茶唱K，全部免費，有效期為十二小時。7.1嗰日，維園或者有五十萬死硬分子遊行，不過同日就有五百五十萬港人北上。氣勢邊個贏晒？梗係唔會係民主派。
另外，由維園阿伯喺六月三十日晚，喺維園放置土製炸彈，炸冧維多利亞女皇銅像，再由江主席以中央軍委主席身份，喺中央台宣布：經查明證實係阿蓋德組織喺特區發動恐怖襲擊，為保障7.1大遊行市民生命安全，宣布戒嚴一日，由解放軍進駐維園。
重有，將幾十個本來應該喺國慶前處決嘅殺人強姦及毒販，提早7.1行刑，為儆戒香港嘅犯罪集團，將行刑地點集中喺香港維園蛋糕亭外對開空地，開放畀示威集會嘅人士參觀。一排槍響之後，本來集緊會嘅三十萬人包括劉千石，就會尖叫散去一大半，剩番咁都留低唔肯走重大嗌「還政於民」嘅一小撮，包括司徒華，就抵畀佢繼續遊行喇。
唔使怕喎。連中方慢慢都明白，7.1遊行唔會危害社會穩定，所以叫左共臨場收晒口。本來有鄔維庸同曾憲梓等不斷用語言挑逗，呢兩日暫時冇咗呢一隻春藥供應，香港人重係咪堅持遊行呢？咁就要睇自己嘅政治定力嘞。
不過連美英操縱嘅伊拉克政權移交，原定六月三十日，計埋國際時差，與香港7.1大遊行撞正期，到時美聯社CNN記者雲集巴格達，邊個得閒飛嚟香港做現場？唔知係咪布殊同貝理雅夾計，臨時將伊拉克政權提早兩日移交，而且並無慶典，咁啲美英傳媒，做完巴格達，聽講昨夜同今日紛紛趕飛機移師嚟香港set機stand-by。人哋咁捧場，香港上國際傳媒頭條，一年都係靠7.1呢鋪，為鞏固國際都市形象，咁又點可以唔上街呢？
傳真︰2623-9278
電郵︰