莫文蔚嘅父母今日結婚四十周年紀念，前晚喺尖沙嘴洲際酒店慶祝，洪金寶都有出席。
講到娛樂圈近況，洪金寶就好勞氣咁話：「有啲導演喺度鬧我，話我拍得唔好，你試吓將佢一生拍過乜嘢戲同我比較下，我唔係靠電影生活，我拍戲係好有誠意，對得住自己，冇呃人錢，收唔收得就係另一回事。」
問洪金寶會唔會同呢啲人永不合作時，佢就話：「唔知喎，好難講，呢件事年幾兩年喇，佢唔可以拍過一、兩部戲就challenge（挑戰）我。我唔理其他人㗎，若果喺美國，我叫佢off㖭！」
洪金寶愈講愈勞氣，唔知佢係咪講緊年前因拍《功夫》鬧不和嘅周星馳呢？問佢會唔會激氣到唔再執導，洪金寶就話：「我為我生存，可能年尾啦。」
提到呢排嘅熱門「毒品」話題，洪金寶話：「吸毒係環境影響，以前個社會十個得兩個吸毒，𠵱家十個可能有八個食，愈嚟愈嚴重，最緊要係自愛自律。」不過佢話唔擔心兒子天明會沾染毒品。
黃凱芹（Chris）噚日出席喺銅鑼灣亨利中心舉行嘅《富士通個人電腦》記者會。
提到最近吳浩康涉嫌藏毒一事，阿Chris就話：「佢係成年人，應該要自己去面對，對於有藝人吸毒我唔覺得驚訝，我連人哋食煙都接受唔到，我肯定唔會試呢啲咁影響健康嘅嘢！」
麥浚龍（Juno）日前去咗廣東佛山同順德宣傳即將發行嘅專輯。Juno先去佛山東健世紀廣場出席「麥浚龍見面會」，同近五百fans會面，有女fans更要求Juno喺佢件衫度簽名留念。Juno話：「有一個嚟自山東嘅fans話，曾經喺大學播我嘅演唱會VCD，全校學生迫爆大禮堂，真係好感動。」
無綫劇集《隔世追兇》嘅演員商天娥、郭晉安同江芷妮噚日到新城接受訪問。
安仔喺訪問中開腔大讚喺劇入面飾演自己母親嘅商天娥演技好，不過商天娥就笑住話：「演一次好喇！唔係媽咪級（演員）嬲我點算？都係做家姐好啲。」
李嘉慧噚日出席手電宣傳活動，有傳模特兒都有吸毒嘅習慣，李嘉慧就話：「我眼見就冇喇，做model要好健康，吸毒對皮膚、眼、身體各方面都唔好，有人話可以減肥，不過呢個世界有好多方法減肥，唔一定要靠呢啲。」
