日本著名編劇作家野澤尚，前日被發現喺佢嘅事務所內自殺身亡，終年四十四歲。
前日下午兩點半左右，野澤嘅老婆打算到事務所搵佢，但一直按門鐘都冇人應門，所以就搵咗人嚟開鎖，點知入屋後竟發現佢老公吊頸自殺身亡，日本警方更喺屋內發現遺書。
野澤啱啱先為日本NHK電視台計劃喺○七年播映嘅大河劇集《坂上之雲》寫好初本，點知佢突然自殺，轟動藝能界，而出版社嘅工作人員亦表示呢幾日並冇發現野澤有任何異樣。
野澤尚喺一九六○年出生，佢畢業於日本大學藝術學部主修電影科，一九八五年以戲劇作家身份出道。佢曾經撰寫過好多出色嘅電影同日劇，包括中山美穗同木村拓哉合演嘅《沉睡森林》；中山美穗同唐澤壽明主演嘅《美味關係》以及豐川悅司主演嘅《青鳥》等等。而野澤尚也曾寫過一部以揭發電視台內幕為題材嘅小說《破線的瑪莉絲》，喺一九九七年獲得日本代表性的懸疑推理小說文學獎項。