莎莎（178）噚日公布全年業績，果然不負眾望，盈利增至1.51億元，比起舊年大升121.4%，除咗末期息5仙外，重有特別股息4仙，真係飲得杯落。
莎莎受到好消息刺激，股價最高見過3.225元，但收報3.05元，冇起跌。經紀黃話，既然有人一早收到風莎莎業績靚爆鏡，自然有人趁好消息沽貨獲利。
經紀黃又有好介紹，推介將於7月8日公布全年業績嘅冠華國際（539），佢話估計業績同樣見得人，可短炒一轉。
冠華業績靚仔，應該有迹可尋，皆因上半年已賺7306.5萬元，比舊年同期上升63%。其後冠華在今年2月成功批股，可惜剛遇上行家廣興（1131）被廉署調查事件，股價被波及下跌，連批股價3.72元亦跌破，低見2.40元。
不過，冠華大股東一直在市場增持，反映佢哋唔係睇得咁差，而且重一路增持至公布業績前一個月先至停手。冠華噚日升8.6%，收2.85元，成交股數急增至515萬股，金額1432.8萬元。
慕容小初