七一有幾多人數，如果馬會肯收受投注，肯定會掀起另一次熱潮。今年特區左共學精咗少少，加埋曾慶紅主人有新立場，唔係好似舊年咁死蠢，一個個出嚟謾罵，想多啲市民上街。
不過，土共嘅一時收聲，當然唔係轉咗死性，只係俾佢哋嘅阿爺硬生生㩒住而已，阿爺唔畀佢哋出火，不過土共仇視自由，憎惡港人嘅獸慾，仍然在體內好似一團火山岩漿咁，不停咁翻滾燃燒，谷住谷住，都重係偶有出現文革衝動嘅標濺溢洩，例如久唔久亦罵一句「七一遊行即是大逆不道」，或者大罵學者聯署要求維持自由人權核心價值嘅聲明，係「聲討中央」嘅一篇「檄文」，兼係「懷念殖民地體制」。可見就算民主派同港人想和解，左共、維園阿伯、鄔曾反港集團，係永遠唔會同你和解。最近啲吠聲低沉咗少少，因為佢哋唔係俾曾副主席割咗聲帶，而係戴住隻竹製嘅口罩。第日口罩一甩，又試噬咬過，呢啲係本性，冇得改嘅。
屯門熱到成三十五度，後日會唔會成四十度就未知。不過天氣熱，人心更熱，為咗協助國家鞏固「一國兩制」，向全世界顯示香港都重係有遊行自由，兼報答曾副主席善意，今年七一遊行人數太少，香港人就好難向國際交代。
肥彭喺七一之前高調宣布，佢嘅政治生涯告一段落，更值得港人七一出嚟行兩轉，當做同肥彭第二次遙距Farewell。喺中國近代史上，肥彭係一個舉足輕重嘅影響力人物。佢當年一嚟到，就便服出巡，食蛋撻、飲涼茶，同市民握手談笑，當時魯平眼坦坦唔知佢搞邊科，今時今日，上自北京嘅胡溫，下至特區阿董，去啲農民屋企包餃子，或者出席南區扒龍船節目，全部係抄襲肥彭抄到十足。肥彭若然向胡溫阿董等追討現代領袖親民手腕嘅知識產權費，睇怕都夠食三世，不過可能佢一早知道中國係一個翻版大國，抄人哋嘢唔使擇日子，所以睇得開。
肥彭嘅風範，值得港人學習。冇錯，香港人係懷念肥彭，吹咩？七一大遊行，唔嗌還政於民，可以齊齊祝肥彭榮休快樂，見到今日戴晒口罩嘅唐狗，更加令人懷念肥彭嗰兩隻乖巧靜局嘅Whisky同Soda！
傳真︰2623-9278
電郵︰