民主倒董力量成員曾健成（亞牛）手藝唔錯，上年7.1大遊行，自製三個大頭公仔，諷刺特首董建華力撐偷步買車嘅財政司前司長梁錦松；又同硬銷二十三條嘅保安局前局長葉劉淑儀，攬住大跳探戈舞。
今年佢又有新搞作，今次對象係行政會議成員梁振英同埋財政司司長唐英年。亞牛話，「阿董搞到香港民怨沸騰，梁振英同唐英年，雖然冇講到出口，話想做下屆特首，但係兩條友勾心鬥角爭出線。」唐唐話，做特首要受各方接受，即是明指英英，亞牛玩吓佢哋都啱嘅。
亞牛整咗佢兩個嘅大頭公仔，想令參加遊行嘅市民，唔止得啖笑，重可以睇清楚佢哋嘅真面目。阿牛𠵱家重考慮緊，到時自己揹晒兩個公仔，定話嗌搵個拍檔，一人揹一個，玩埋相聲，搞吓氣氛畀參加遊行嘅市民開心吓。
傳真︰2623-9278
電郵︰
