百利保發展的元朗彩虹軒，示範單位搭一個賣一個，之前搭建的四個已經全部賣晒，發展商近期又火速完成兩個新示範單位，雖然全屋都係見慣見熟的宜家貨色，不過配搭起嚟又幾清新討好，估計好快就會成為買家囊中物。
彩虹軒示範單位所以咁好賣，除咗擺設裝潢夠吸引，設計師應記一功之外，原來揀邊個單位去做都大有學問，亦係銷售策略之一。發展商唔會揀樓盤中最靚最貴嗰間，因為買得樓王嘅買家，多數鍾意自己搞裝修，用嚟做示範單位一定撞板兼嘥料；不過亦唔會揀質素最差最平嗰間，皆因連裝修一般賣貴一至兩成，變相提高咗樓盤最低入場費，削弱吸引力。
發展商通常會揀質素中上嘅單位，景觀或者位置坐向方面比較吸引，加埋靚靚嘅裝身，點會唔令人心動？
樓市走勢未明，市場低價成交增，聽利嘉閣分行經理陳孝傑講，一家銀行因換馬，低價沽售大坑高景大廈三個單位，一周左右便全數售出，買家均為投資者。
三個單位均為八百方呎，成交價一百九十萬至二百一十五萬（連車位），而市場上的放盤，最平叫價也要二百四十八萬。
另外，中原分行經理陳志輝表示，一名測量師因見樓價缺乏大升條件，並可能再跌，於是搶先賣樓，除願意付出三個佣外，還將叫價調低至八十八萬元，一日即成功售出，較同類成交低一成二。
香港與內地關係日見密切，地產代理監管局都同內地機構作更多交流。
今個月中，就招呼咗廣州市代表團，主要都係傾吓兩地地產代理的規管同發展前景，香港多個地產代理商會都有代表出席；代表團另外亦有參觀土地註冊處。
其實香港的代理行，一早已睇好內地市場潛力，相信今次交流，香港的代表可以乘機攞吓料。
澳門樓市度過冰河時期，近年鬧得熱烘烘，唔少地產商或代理都想進軍澳門分一杯羹，但過去都只聞樓梯響。美聯物業今次就勇於踏出第一步，噚日在澳門開第一間分行。到賀嘉賓除澳門地產發展商外，香港炒家玩具城鄭氏兄弟都有出席，重話要研究炒吓澳門舖喎。
聽美聯澳門部董事張一輝講，公司主要幫港資或外資買澳門物業、又或者幫澳門人買香港物業；不過，佢話當地人嘅生意較難做啲。
如果好境，話唔定同行遲啲紛紛跟隨在澳門插旗。
係人都知裕泰興太子爺羅守耀係超級戲迷，為咗實現夢想，去年揼錢入股杜琪峰的電影公司銀河映像，名正言順參與拍戲，投入程度就連賣樓都不忘宣傳新戲。
裕泰興嘅旺角長旺雅苑，推出二按優惠，羅守耀有份參與嘅新片《柔道龍虎榜》又就快上映，於是喺售樓處一角闢出電影預展中心，展覽戲中主角郭富城、古天樂、梁家輝及應采兒等劇照同有關產品，等睇樓客可以先睹為快。
另外，又加送首映戲飛畀準買家，賣樓同時宣傳新戲，唔知戲迷會唔會專程去睇樓，順道買番個單位呢？
蘭西
電郵地址：
