噚日吳靄儀同湯家驊同記者茶敍，湯大狀話，有人建議佢7.1遊行時唔好着T恤，而要着晒老西、打晒呔，保持專業形象兼博出位。見湯大狀講得咁認真，記者即刻提醒佢，呢幾日天文台都發出酷熱警告，咁着法分分鐘未出發已經中暑。
至於梁家傑，大家笑佢更注重儀容，袋巾必不可少，分分鐘都會陪湯大狀一齊着西裝遊行。梁家傑近日脾氣好躁，原來佢外父最近過身，唔怪得啦。吳靄儀話，都勸過梁家傑做人有時可以「放啤」啲，唔使成日都咁嚴肅，湯大狀馬上話好難，因為梁生嘅字典裏面唔會有「放啤」呢個詞。
今日幾位大狀會出動派傳單，呼籲市民7.1上街表達意見，朝早七點起梁家傑會去到觀塘裕民坊，湯家驊則去將軍澳地鐵尚德出口，余若薇同吳靄儀會分別陪同兩人左右。
（圖）45條關注組7.1遊行時會發售精華CD，每隻賣廿蚊。
傳真︰2623-9278
電郵︰