日前因涉嫌藏毒被警方拘捕的英皇歌手吳浩康，前日首度復工趕拍無綫劇集《學警雄心》，同劇演員廖啟智曾指吳浩康經常流鼻水，但前晚有份與吳浩康拍對手戲的陳鍵鋒則指他昨日沒流鼻水，而且十分好精神。
吳浩康自涉嫌藏毒被捕後，前日首度露面返無綫將軍澳電視廣播城為劇集《學警雄心》開工。
在劇中扮演吳浩康父親的廖啟智日前曾指他經常流鼻水，但陳鍵鋒前晚收工時被問到吳浩康的開工情況時則說：「佢士氣高昂，冇流鼻水，好精神，健康仔。佢剪短一頭短髮，好有陽光氣息。我哋有傾偈，不過冇講佢單嘢，只係傾閒偈，同埋講劇情同研究對白。」
由於二人在劇中有動作場面，陳鍵鋒說：「佢都有份提供意見，好似動作指導咁。」而吳浩康前晚約九時五十分離開無綫，數名歌迷在將軍澳電視廣播城外守候多時，一見到吳浩康即大叫他快點離開迴避記者追訪。吳浩康約十時多返抵麗港城寓所時，記者爭相採訪，其間有人差點跌倒，吳浩康即關心地說：「小心啲。」還不忘向記者說：「今日辛苦晒，辛苦晒。」
吳浩康昨日分別接受了港台及商台的電話訪問，提及今次事件對其父母有否影響時，他說：「我有同佢哋傾過，見到佢哋好辛苦，好擔心同失望。出事當晚我爸爸見到我，我覺得佢嘅眼神都幾失望，我覺得好對佢唔住，但到今日為止佢都支持我。而媽媽會比較少講嘢，不過都會同我傾偈，佢就有喊，而爸爸都有眼濕濕，我咁大個仔第一次見我爸爸喊。」
此外，《學》劇監製黃偉聲昨日在電話中說：「噚晚主要集中拍五場戲，因為一氣呵成，吳浩康狀態好好，噚晚都係拍唔開心場面多，好似嗌交戲，都好順利，吳浩康重猛同我講唔好意思，佢知麻煩到大家。」黃偉聲又透露前晚拍攝的劇情，主要講述有人迫吳浩康打黑巿拳賽和被迫協助綁架薛凱琪和陳鍵鋒。
採訪：卓美娟 攝影：陳偉權