首富李嘉誠出錢出力創辦汕頭大學，作育英才之餘又大講古仔。噚日佢又同長江商學院一班EMBA畢業生講做人道理──「奉獻的藝術」，講得好亢奮。
超人話近年同人講自己多咗個仔，朋友恭喜佢時都有啲唔好意思，不過佢就欣然受落，因為第三個仔就係「李嘉誠基金會」，超人話呢個仔能夠有系統咁發揮財富嘅能力，喺世上散播最好嘅種子，共同建立一個較平等同富同情心嘅社會喎。
超人又講到佢最羨慕的一位古人係范蠡，因為范蠡唔單止學富五車，重有紅顏知己西施共患難，相信范蠡一生無憾。
佢重話，范蠡憑佢嘅經濟智慧贏到巨大財富，不過佢為怕出名，成日改名換姓，三次遷徙，改變自己去遷就個社會。而被美國人民譽為「偉大的公民」嘅富蘭克林則同范蠡唔同，佢係名成利就之後不斷推動社會前進。
超人講咁多嘢，無非想話今日嘅中國人好幸運，唔使做范蠡，可以學富蘭克林，但係最緊要係先確立一個做人方向，就活得更快樂更精采。
（圖）超人講古手舞足蹈好鬼亢奮。
傳真︰2623-9278
電郵︰