美股上周五挫逾70點，但港股噚日冇咩反應，好友在12200水平力頂，全日收報12194，升9點，成交只得111億元。
莎莎國際（178）盈利增長1.2倍至1.5億元，全年派息比率高達百分百，不過股價先升後回，收3.05元，冇起跌。黑客話，莎莎公布業績前，證券行好似收到料，預知盈利倍升兼慷慨派息，而且有證券行重估中派息比率，唔引起監管當局關注就奇。不過，莎莎受惠自由行而盈利大升，是鐵一般的事實，對股價肯定有支持，利好因素最終會在股價反映。
平安保險（2318）策略性股東兼保薦人高盛十分落力，昨日排隊掛牌力托，幾乎無時無刻都在10.30元掛有逾1億股買盤守住，擺到明任你點沽都唔怕。平保招股規模高達143億元，其他大行沽盤相當多，但高盛守得穩如泰山，令阿虎歎為觀止。日後有高盛做保薦人的新股，睇嚟都要捧吓場。呢次高盛托得咁有信心，唔知係咪反映滙控（005）將增持平保呢？平保一度急升至10.65元，全日收報10.60元，升2.9%。
運盛中國（085）噚日突然大升，高見0.45元，最多升過25%，收報0.40元，仍升11%。公司下月中就會舉行股東會，表決向中國電子信息發行65億股新股，購入手機業務的交易。若通過，新大股東持股量將高達80.66%，須在市場進行配售減持6.1億股，值得注意的是這批股份，每股成本價僅為4仙，較噚日收市價大折讓90%。
阿虎