經常聽到啲年輕藝人話自己太忙，又要做呢樣、又要做嗰樣，又冇得瞓，又剩，我嘅答案一定係：「你忙得過劉德華?!」
劉華最得人驚嘅地方係唔覺佢忙，每次見到佢出席場合都係精神奕奕，體力充沛，蓮子蓉咁口面，倦容從來都絕迹在他面上，除非係劇情需要，佢先至會皺住眉頭用手抹一抹塊面再郁一郁個腮扮攰。
由於成日喺電視同報紙見到劉華，所以唔覺佢忙緊乜嘢，但細心一諗，之前嘅幾個月，佢其實一直忙緊幾單大嘢。張藝謀導演嘅《十面埋伏》，又要取古裝景，又要在雪地拍打，張藝謀導演要求嚴謹，但總聽不到劉華呻遠呻辛苦，除了在製作特輯。馮小剛導演的《天下無賊》，又係去到冇雷公咁遠取景，荒山野嶺加上冇啖好食，但製作特輯中總係見到劉華笑口噬噬，重幫手度打戲㖭。杜琪峰導演的《賊公賊婆》，唔知此片講啲乜，但好似去咗意大利取景。重要錄唱片、拍廣告、搞歌迷聚會、出席要出席嘅場合，你話劉華有幾忙？你話劉華幾有規律？你話劉華有幾自愛？你話劉華係咪值得學習？
都係嗰句，咪再呻攰呻忙呻辛苦，呻得兩呻就以後唔使呻，因為會變咗冇嘢做。有幾忙吖？忙得過劉德華？