特首促成放寬內地拍戲配額
秋生嘲何志平「中間嗰個咪廢」

黃秋生前晚在演藝學院提到內地放寬港星拍戲的配額是好事，但對於此事是由特首董建華促成，秋生則批評應由民政事務局局長何志平處理，而非每事都由特首去做，否則做中間的官員就很廢。

黃秋生、朱茵和張達明，以及劉鑾雄的母親和胞妹劉玉珍前晚在演藝學院出席舊生晚宴，對於內地的廣電局放寬香港演員參演內地影視作品的配額，秋生表示歡迎，不過當提到日前演藝人協會會長曾志偉指有此成果，是香港特區政府與港演藝人的努力時，曾批評演藝人協會沒有為演員爭取權益的秋生則說：「究竟今次係佢（曾志偉）做到，定係個會做到先。」

「應該攞埋份糧」
志偉曾透露有幾次與特首董建華見面，都提及放寬港星到內地拍戲的配額問題，現在的成果顯示特首出了不少力，但秋生前晚表示沒可能每事都由特首親力親為，他說：「如果攞卷廁紙都要董伯伯做，咁佢咪應該攞埋何志平份糧，呢啲嘢應該係何志平做，如果乜嘢都直接去到董伯伯處，咁中間嗰個咪都係廢囉！」

吸毒前車可鑑
對於近期接連有年輕一輩藝人涉嫌吸毒，對藝人形象造成很大損害，秋生說：「咁又唔係所有藝人都係咁，其實都有好多好嘅藝人。雖然呢個圈有啲藝人有吸毒，但我想畀個忠告佢哋，就係前車可鑑，如果要發洩可以去學吓英文或日文，唔應該選擇食呢啲嘢，目前嚟講都冇乜藝人敢喺我面前食。」
採訪：梁錦雯攝影：何國豪