英皇男子組合Boy'Z成員Kenny噚日接受港台訪問，講到有傳佢哋喺髮型屋整頭髮時，因Kenny叫Steven勸佢緋聞女友傅珮嘉收口而打起上嚟，Kenny話：「講嘢大聲啲就話打交，我係同Steven鬧交，我同佢嘈點解佢個頭靚過我。」咁佢哋有冇為傅珮嘉嘈過呢？Kenny話：「係都唔會為佢鬧交，我寧願評叉燒都唔評個女仔。」言下之意，似乎有所不滿喎！
另外，蔡卓妍（阿Sa）、梁詠琪(GiGi）同Shine噚日出席「新城國語力頒獎禮」記者會，呢個頒獎禮喺八月一號舉行，孔慶翔重會做表演嘉賓。講到Boy'Z被傳打交，阿Sa話一早打咗電話畀Kenny，重好抵死咁笑Kenny點解突然變得咁man？點知Kenny話阿Sa係無知婦孺，總之佢同Steven冇打交。
而GiGi就話上星期先收到通知，話唔可以喺杭州搞簽唱會，不過有關當局就冇講明點解唔畀搞。至於早前被指抄歌，GiGi話唔會因為咁而唔創作。
藍奕邦前晚喺將軍澳接受訪問時，話識咗吳浩康好多年，佢覺得現階段吳浩康只係涉嫌藏毒，但唔代表佢有吸食毒品嘅習慣。唔知藍奕邦係咪想幫朋友講好話，佢話唔應該折磨一個細路仔，要捉就捉嗰班拆家，佢重覺得警方應該去捉蛇頭而唔係去捉雞仔。藍奕邦咁講就唔啱啦，始終毒品害人，應該多方面打擊嘅！
楊千嬅最近出咗新大碟《電光幻影ElectricGirl》，隻碟嘅設計好特別，隻CD收埋喺中間嗰頁嘅卡紙之間，而個封口就喺包裝盒頂部，搞到好多人搵咗好耐都搵唔到隻CD。而身在美加開個唱嘅千嬅亦收到好多朋友嘅短訊，原來係專誠問佢隻碟放喺邊。
由竹野內豐同常盤貴子主演嘅日劇《溥傑與王妃》上星期一喺無綫播出，首集收視有十九點（即一百二十五萬人收看），比之前同時段嘅《百分百感覺》升咗六點。至於宣萱嘅《一屋兩家三姓人》首周只有二十七點（約一百七十七萬人次），郭晉安嘅《隔世追兇》得二十九點（約一百九十萬人次），睇怕無綫要檢討吓！
王祖賢由玉女變肥女，本來佢話因為要拍泰國GMM嘅電影先狂增肥，但後來又俾人話根本冇呢部戲。噚日王祖賢發聲明，佢話𠵱家過住平淡簡單嘅生活，平時行街煮飯，過得好開心。講到部戲，佢就話對演藝工作已經冇乜興趣，所以都唔拍套戲喇。而泰國GMM公司亦發聲明，話因為王祖賢未同徐楓解約，所以暫停咗部戲喎！
