林嘉欣噚日出席工聯會康齡翠屏長者中心舉行嘅「耳聽心言基金」揭幕儀式，如果藝人抽到時間嚟做善事，認真係好事，因為馮仁昭聽到林嘉欣呢排幾忙，連《我要做Model》監製谷德昭同身為女主角嘅嘉欣度期宣傳都度唔到，結果除咗首映外，咁多次宣傳都係得男主角鄭中基、男女配角李彩樺同森美撐場，如果肥谷有少少嬲都係好正常。
雖然林嘉欣冇去到宣傳，但套戲依然幾收得，問佢點解唔做宣傳呢？林嘉欣就解畫話：「其實我咁啱要去台灣拍廣告，再加上《救命》又喺台灣上。」
《救命》喺台灣上就咁緊張，香港套《我要做Model》宣傳又唔見佢，難免畀人覺得佢大細超，嘉欣又話：「其實我本身都有飲品廣告喺身，咁套戲有啤酒商贊助，我出席唔係咁方便。」有廣告約喺身係多啲嘢諗，馮仁昭都體諒佢嘅。
講到近日吳浩康涉藏毒被捕一事，嘉欣就話：「我生活好健康，好少出夜街㗎！」 採訪：李珮洳
近日因吳浩康涉嫌藏毒一事搞到人心惶惶，更有傳言指人氣滑落男子組合牽涉其中，Cookies嘅Miki、Theresa同Stephy就力撐男子組合Shine形象健康，Miki更指Shine嘅人氣冇滑落，佢話：「我覺得佢哋好健康，佢兩個只係過咗台灣做宣傳，我晚晚都睇到佢哋嘅廣告，一日警方未證實嘅嘢大家都唔好亂講，咁樣會好影響人哋。」
梁朝偉噚日四十二歲正日生日，佢女友劉嘉玲人在上海，偉仔之前去過上海同影迷好開心咁慶祝完生日後就返香港，佢噚日晏晝去咗麥當勞道嘅朋友屋企坐咗一陣，就返屋企，好似冇乜節目咁。其實偉仔年年生日都去嗰對夫婦朋友屋企傾吓偈，捉下棋咁，都好寫意，或者人大咗心境會唔同，生日都唔一定要狂歡先開心嘅。
歐陽海璇噚日去上環警署報警，話自己俾人呃咗啲錢。佢話有個朋友介紹咗個印尼富商畀佢識，又介紹佢買房地產，之後幾日就問歐陽海璇借二萬幾蚊，重開番張票畀佢叫佢自己去銀行攞錢。點知佢去到銀行發現冇呢個戶口，就連個朋友都好似人間蒸發咁。其實呢啲橋好舊，通常喺《警訊》入面都會見到，唔通歐陽海璇少睇電視？
周汶錡噚日喺觀塘出席活動，有記者提到娛圈吸毒問題，周汶錡就成個人變得好嚴肅緊張，唔知係咪怕人提起佢前男友杜德偉，周汶錡就話：「每日講住會畀人好大壓力，要畀機會人改變嘛，公眾人物先會俾人討論，其實唔係好大件事啫，我諗唔係呢個圈先有吸毒。」周汶錡又話佢冇受過引誘，亦冇接觸過毒品呢啲嘢喎。
劉浩龍噚日出席喺葵芳舉行嘅「普通話行行出狀元」活動，他一到場就即刻向記者致歉，原因係佢前日被記者問到有冇喺吳國敬身上聞到類似大麻嘅異味時，佢竟然毫不客氣咁話自己唔係一隻狗，所以個鼻唔靈敏。噚日佢就坦白承認話自己EQ低講錯說話，事後感到好內疚喎。
