學者話通訊科技將世界變成地球村，𠵱家配合埋水貨商就更天下無敵。例如原宿今朝11點出咗件復刻迷彩猿人T，下午兩點香港人上網，睇到就打畀水貨大亨間舖代訂，袁仁祥嫂收到Order，立即打祥哥的日本手提命令佢入貨，重要即日寄EMS返港，第二日下晝香港人便可着住推出48小時唔夠嘅猿人T落銅鑼灣威威。儲物王「垃圾羅」近日嘅遭遇更具代表性，佢兩個月前喺日本UNDERCOVER買咗個牧童袋，袋上掛上一抽原裝UC古堡鎖匙，佢對呢個袋實在愛不釋手，點知某日去睇黃耀明演唱會時，竟然跌咗成抽鎖匙，遍尋不獲；呢抽鎖匙其實係成個袋精髓所在，個袋賣$2,000，抽UC鎖匙應值$800！
「垃圾羅」急如熱鍋上的螞蟻，上個禮拜更直飛南青山UNDERCOVER向Sales求救，Sales姐姐話Sorry幫你唔到，不如去附近有名的SantaMonica古着店搵搵喇，嗰度有類似款式可做代替品喎。「垃圾羅」以5分鐘時間由南青山飛落表參道SantaMonica，點知只搵到一抽用嚟開寫字檯櫃筒的Yale匙。失落萬分下，索性去炒舖買個新袋補數，眾裏尋它千百度，竟然最後喺名炒舖HeatWave搵番自己抽UC鎖匙（因為有記認），被人拆開嚟賣，兩條賣4,000日圓。至於邊個做嘅好事？真係天曉得囉！
主持人：大食Jack