民主派演藝界人士岑建勳，噚日因為爆出將獲發回鄉證，成為傳媒追訪對象，佢都算好合作，答完又答，雖然要返內地搵食，腰骨亦冇因此而患「軟骨症」，話平反六四立場冇改。
岑建勳嘅硬頸性格原來細細個就顯露出嚟，佢噚日出席一親子講座時話，自己讀書時從未考過三名以外，但九歲時一次寫毛筆字，覺得寫來寫去都係「上大人孔乙己」好悶，於是攞咗本馬經當字帖，抄咗成版馬名，點知畀老師鬧，重評分得個「丁」。
從來都係「甲」等成績嘅岑建勳好不滿，竟然去搵校長評理，好笑嘅係女校長唔識馬名，亦未見過馬經，睇到啲大字都讚小岑寫得好，重應承為佢平反，後來校長聽咗老師嘅講法，先至打消為小岑平反嘅念頭。
講開回鄉證，李柱銘亦發緊回鄉夢，話如果成真，會同老婆同仔仔商量吓去大陸邊度渡假。
傳真︰2623-9278
電郵︰