在觀看德國大戰捷克的賽事前，問句身邊的爛賭波迷，究竟想德國還是荷蘭入八強？「講睇波定講賭波先？」爛賭波迷答道。「吓？乜有分別嘅咩？」「你鋪話法，講睇波就一定想荷蘭入，因為球員個人技術夠，有娛樂性又夠神經，德國波就一個悶字，穩穩陣陣，好食唔好睇；但係如果講賭波就望德國入，因為德國條路好捉，正路啲，荷蘭班波好離譜，擺明人腳齊全，個個都係世界級球員，但係自己踢自己波，輸波唔出奇，但唔知幾時癲起上嚟又會狂數對手。」
世界的足球壇已經越嚟越似showbusiness，肯定有一個荷李活級的showbusiness專家在幕後run住盤生意，各支勁旅各有特色，各有個性，每場球賽更是超級充滿戲劇性。瑞典臨完場前二比二迫和丹麥，無論意大利在另一邊廂贏一百比零都冇用，但球員在球場上未知噩耗，在完場前，代替托迪揹上國家包袱的壞孩子卡斯辛奴轟入一球，即時歡喜若狂，奔跑到球迷前接受祝賀；但球迷靜如死水，及至教職人員將壞消息告知，卡斯辛奴當堂成個人淡晒色，滴下男兒淚，這樣煽情的劇本真係寫咗都唔敢拍，但現實偏偏又發生了，真吹唔脹。
卡斯辛奴射入最後一球時那種砰一聲升上天，然後隆一聲撻落地的表情，演員們真應該好好參考，冇得頂！