日前因涉嫌藏毒而被警方拘捕的吳浩康，昨日首度公開露面，到無綫將軍澳電視廣播城為劇集《學警雄心》開工。吳浩康雖然面容憔悴，但面對半百傳媒追訪仍表現從容，除公開表示為自己的所作所為感後悔外，更向家人及同事道歉。
昨日是吳浩康被捕以來首度公開露面，引來約十輛採訪車在其麗港城寓所樓下守候，大廈保安數度驅趕傳媒，更一度報警求助。而記者等候期間，有一些住在該處的小朋友對記者說：「食白粉，衰格！」
昨日下午約三時半，戴上眼鏡的吳浩康在經理人及兩名助手陪同下離開寓所，六名在場守候多時的fans即飛撲上前送上慰問卡及糖果，更表示會永遠支持他。而在家休息多日的吳浩康面容頗為憔悴，但他見到在場記者時仍強顏歡笑，企定定讓記者拍照，並說：「好對唔住！辛苦晒大家，好對唔住大家。」問到他連日能否入睡時，吳浩康苦笑說：「瞓到。」
吳浩康隨即乘坐保母車往無綫，《學》劇監製黃偉聲在化妝間一度拉他到一旁密斟，二人走進錄影廠後約十分鐘，才再度現身接受訪問。記者問吳浩康近日心情如何？他說：「都係咁啦，為大家帶嚟不便，麻煩到大家真係好對唔住，我想同公司同事、支持我嘅朋友講，以後我會努力做嘢。」未知吳浩康在家可有反思己過？吳浩康說：「都係諗番自己做嘅嘢，以後我會努力做好啲嘢，學多啲嘢。」吳浩康又坦言家人及同事均為他今次事件感到不開心。
英皇日前表示若事件屬實會與吳浩康解約，昨日問到他對前途可感擔憂時，吳浩康說：「未係適當時候講，我會做好啲嘢，拍好個劇，多謝監製畀機會我。」而對於無綫因擔心事情有變化而提前集中拍攝其戲份，吳浩康認為是好事，他說：「都好嘅，好過取消，機會唔係個個都得到，多謝監製對我嘅支持同繼續畀機會我。我有同楊生（英皇老闆楊受成）聯絡，楊生叫我安心打官司同投入工作。我都知公司同屋企人好失望，我會努力做好啲嘢。」
當記者追問吳浩康究竟「食咗幾耐」時，吳浩康面色一沉地說：「呢樣嘢唔方便講。」而其經理人則即時拉吳浩康入廠，意圖阻止記者再提問敏感問題。記者再追問吳浩康有否感到後悔時，他說：「有，我令到好多人好失望。」
另一方面，薛凱琪昨晚與吳浩康拍完一場對手戲後接受訪問時，指吳浩康工作心情未見異樣，她說：「佢好投入，冇心神恍惚，亦冇因為佢而NG。我哋有傾偈，但只係傾普通嘢，冇講呢件事。」
而監製黃偉聲則說：「我淨係問佢情緒係咪冇問題，今日佢返嚟先至攞劇本，我要畀啲時間佢睇劇本，今日佢會拍六場戲拍到十一點幾。後生仔有錯都應該畀機會，唔好抹煞佢前途。」黃偉聲又表示警察公共關係科未有就吳浩康事件對新劇作干預。而吳浩康原定下周日在銅鑼灣CEONeway出席的芝華士活動已由另一名藝人頂上。
此外，傅珮嘉昨日到奧海城出席活動時，主動為自己近日的言論道歉，她說：「我唔想再多言啦！如果我之前講多咗講錯咗我會返去檢討，同大家講句對唔住，以後我唔想再講。我冇同過阿Deep（吳浩康）打牌，同佢只係普通朋友。而且我唔想再同任何藝人、公司扯上關係，如果我講一個男藝人兩句就話我追佢，我覺得好恐怖，雖然我姓傅，不過唔係負面嘅負，所以唔想再有負面新聞。」問到她有否覺得自己未經三思亂發言？傅珮嘉則說：「我一向講嘢都係咁直，總之我要顧及自己同家人嘅名聲。」
採訪：卓美娟
攝影：陳偉權
