今日又有新股掛牌，就係賣運動服裝嘅李寧（2331），隻股招股之時，大市氣氛都唔係咁好，但竟然賣個滿堂紅，令小初百思不得其解，莫非真係有好多fans捧場？
經紀黃話，隻股同騰訊（700）一樣，有一大班大陸同胞熱烈捧場，所以搞到超額認購倍數有成131倍咁勁，但正因為公開招股部份太踴躍，所以要在國際配售部份回撥，令公開發售與國際配售比例各佔一半。雖然係咁，但大陸同胞一向熱情，估計李寧今日掛牌，應該會有好表現。
另外，向來受基金追捧嘅工業股偉易達（303），將在明日公布全年業績。經紀黃話，差唔多間間證券行都估佢盈利較去年倒退，部份證券行甚至叫客沽貨。
經紀黃又話，偉易達盈利倒退，估計原因不外乎係電子學習產品業績倒退，電話銷售放緩所致。不過，就算業績倒退，估計股價亦不致大跌，因為除咗大股東外，金手指亦揸咗唔少貨，聽講持股量達13%咁多。
由於貨源歸邊，所以就算大市在5月份水深火熱之時，偉易達股價雖一度跌至10元，但好快已經彈番上嚟。
慕容小初